دهۆك.. نێزیكی 25 هزار خانیان دێ هێنە تاپۆكرن
ئەندازیار دیار بەحری رەسول، رێڤەبەرێ گشتیێ باژێرڤانیان ل پارێزگەها دهۆكێ دیار كر، ماوێ 19 سالانە چو خانی و ئەردێن زێدەگاڤی ل سنوورێ پارێزگەها دهۆكێ نەهاتینە تاپۆكرن و نها پەرلەمانێ كوردستانێ ب رێكا پرۆژەیاسایەكێ هەول ددەت ڤێ ئاریشێ چارەسەربكەت و ئەگە ئەڤ پرۆژەیێ فراكسیۆنا پارتی سەربگریت، دێ نێزیكی 25 هزار خانیان ل سنوورێ پارێزگەها دهۆكێ هێنە تاپۆكرن و ئاریشا هەموویان چارەسەر بیت.
سەرۆكێ لژنەیا قانوونی ل پەرلەمانێ كوردستانێ راگەهاند؛ ئەرد و خانیێن زێدەگاڤی ل هەرێما كوردستانێ دێ ل گۆرەی قانوونەكێ هێنە تاپۆكرن و نها كار ل سەر دهێتە كرن و رەنگە سێ خواندن بۆ پرۆژەقانونا تاپۆكرنا خانیێن زێدەگاڤی بهێنە كرن.
بژار كۆچەر سەرۆكێ لژنەیا قانوونی یا پەرلەمانێ كوردستانێ دیار كر، لژنەیا وان پێشنیازا یاسایەكا تایبەت بۆ تاپۆكرنا خانیێن زێدەگاڤی ل سنۆرێن باژێرڤانیێن هەرێما كوردستانێ كریە و ئاراستەی سەرۆكاتیا پەرلەمانێ كوردستانێ هاتیە كرن و بریارە سێ خواندن بۆ ڤی پرۆژە قانوونێ بهێنە كرن.
زێدەتر ژ 25 هزار خانیێن زێدەگاڤی ل پارێزگەها دهۆكێ هەنە و هژمارەك ژ وان ئەوێن بەری سالا 2000 هاتینە ئاڤاكرن هەموو ب نڤیسارێن فەرمی ژ ئالیێ حۆكمەتا هەرێما كوردستانێ ڤە هاتینە تاپۆكرن، بەلێ ئەڤە ماوێ 19 سالانە چو خانیێن زێدەگاڤی ل دهۆكێ نەهاتینە تاپۆكرن. پەرلەمانێ عیراقێ ژی د ڤێ مەهێ دا پرۆژە قانوونەك بەرهەڤكریە بۆ هندێ ئەو خانیێن ب زێدەگاڤی هاتینە دروستكرن هەتا سالا 2017 هەموو بهێنە تاپۆكرن و خواندنا ئێكێ ژی بۆ ڤی پرۆژە قانوونێ هاتیە كرن، بەلێ هێشتا ب دروستی ئاشكرا نەبوویە كا ئەڤ پرۆژە قانوونە دێ هەرێما كوردستانێ ژی ڤەگریت یان نە.
باسنيوز
