بریارە ئەڤرۆ رۆژا ئێکشەمبی ل کۆچکا پارێزگەھا دھۆکێ کۆمبوونەک ل سەر ئاستێ بلند بھێتە ئەنجامدان و تێدا پێنچ پرۆژەیێن ستراتیژی رابگەھینن.

ژێدەرەکی ژ کۆمپانیا کاڤین گرۆپ تایبەت دیار کر، ئەڤرۆ ل دەمژمێر 12:00 نیڤرۆ دێ کۆمبوونەک ھێتە سازکرن و تێدا دێ پێنچ پرۆژەیێن ستراتیژی ھێنە راگەھاندن و پشتی ھینگێ دێ د کۆنگرەیەکێ رۆژنامەڤانی دا ھەموو زانیاری ل سەر وان پرۆژەیان ھێنە راگەھاندن.

ئاشکرا ژی کر کو د ناڤا ڤان پرۆژەیێن ستراتیژی دا، دێ سێ ئەندەرپاس و ئۆڤەرپاسێن مەزن ل سەر جادا بارزان یا 100 مەتری یا گشتی ھێنە دانان و ئێک ژ وان ئەندەرپاسان دێ ل ترافیکا مزگەفتا ئیمام حەمزە ھێتە دانان و ئێک ل نێزیک فەرماندەیا دھۆک و ئێک ژی ل ترافیکا نێزیک ناڤنجیا سەفین یا کچان. ھەروەسا دوو پرۆژەیێن دی دێ ھێنە راگەھاندن، ئەو ژی تمامکرنا جادەیا کەمەری یا تاخێ نزارکێ ب درێژیا 1505مەتران و پرۆژەیێ ڤەکرن و قێرکرنا جادا خزمەتگۆزاری ل جادا بارزان ب درێژیا 3500 مەتران.

موقەدم ئازاد تاھا، پەیڤدارێ رێڤەبەریا ھاتن و چوونا پارێزگەھا دھۆکێ دیار کر، چەند سالەکە قەلەبالغەکا مەزن ل سەر جادا 100 مەتری یا بارزان ھەی و ھیچ ئەندەرپاسەک ل سەر نینە و زۆر ترافیک ل سەر ڤێ جادێ ھەنە و 70% ژ رێڤەبەریێن دھۆکێ ل سەر ڤێ جادێ ھاتینە دانان، ئەگەر ئەڤ ھەرسێ ئەندەرپاسە ل سەر ڤێ جادێ بھێنە چێکرن، دێ ب رێژەیەکا مەزن قەلەبالغ و گرفتا ترافیکی ل سەر ڤێ جادێ کێمتر لێ ھێت.










باسنيوز