بڕیارە مووچەی چوار مانگی ڕابردووی ھێزەکانی پێشمەرگە لە لایەن حکوومەتی فیدڕاڵەوە خەرج بکرێت و ئەندامێکی لیژنەی داراییی پەرلەمانی عێراقیش ئاشکرای کرد، تەنیا چەند ھۆکارێکی تەکنیکی ماون بۆ خەرجکردنی مووچەی پێشمەرگە."

دکتۆر ئەحمەد سەفار، ئەندامی لیژنەی داراییی پەرلەمانی عێراق بۆ ماڵپەڕی فەرمیی پارتی دیموکراتی کوردستان گوتی: "پرسی مووچەی ھێزەکانی پێشمەرگە لە بەغدا تەنیا لەسەر ھەندێ بابەتی تەکنیکی ماوە خەرج بکرێت، چونکە لەنێو یاسای بوودجەی گشتیی عێراقدا چارەسەر کراوە ھاوشێوەی مووچەی فەرمانبەران، بەڵام پێویستە وەزارەتی دارایی و بەرگریی بەغدا لەگەل وەزارەتی پێشمەرگە بگەنە لێکتێگەیشتن و ئەو ھۆکارە تەکنیکیانە چارەسەر بکەن بۆ خەرجکردنی مووچەی ھێزەکانی پێشمەرگە."

ئەندامەکەی لیژنەی دارایی ڕوونی کردەوە: "ئێمە وەک لیژنەی دارایی ھەموو ڕێگایەکمان چارەسەر کردووە بۆ خەرجکردنی مووچەی پێشمەرگە لە بوودجەی ئەمساڵی عێراق، ئەگەرچی لەسەر ھەندێ ژمارە و چۆنیەتیی ھاوکاریکردنی ھێزی پێشمەرگە دەگەڕێتەوە بۆ ھەردوو وەزارەتی پەیوەنداری ھەرێم و فیدڕاڵ."

دکتۆر ئەحمەد سەفار دەشڵێت: "بەپێی یاسای بوودجە ئەرکە لەسەر دارایی عێراق مانگانە ٦٨ ملیار دینار وەک مووچە بۆ ھێزەکانی پێشمەرگە ڕەوانەی ھەرێمی کوردستان بکات و لە مانگی یەکی ئەمساڵیشەوە بۆیان ھەژمار دەکرێت، من لەو باوەڕەدام ئەو کێشانەی ماون چارەسەر دەکرێ و لە سەرەتای ئەمساڵەوە مووچەی پێشمەرگە لە بەغداوە بۆیان خەرج دەکرێت."


kdp-