سه‌رله‌به‌یانیی ئه‌مڕۆ دووشه‌ممه‌ 10/12/2018 نێچیرڤان بارزانی سه‌رۆكوه‌زیرانی هه‌رێمی كوردستان، پێشوازی له‌ جۆن وێلكس باڵیۆزی به‌ریتانیا له‌ عێراق و لۆرد مارتن وار كونسووڵی گشتیی به‌ریتانیا له‌ هه‌رێمی كوردستان و فرانسیس مۆد پێكهاتبوو.



له‌ دیدارکەداجۆن وێلكس باسی دوا پێشهاته‌ سیاسی و ئه‌منییه‌كانی ناوچه‌كه‌ و په‌یوه‌ندییه‌كانی هه‌ولێر و به‌غدا كرد و جه‌ختی له‌ به‌رده‌وامیی پشتگیریی حكوومه‌تی به‌ریتانیا بۆ هه‌رێمی كوردستان و دیالۆگی هه‌ولێر ـ به‌غدا كرده‌وه‌، هه‌روه‌ها چاكسازییه‌كانی حكوومه‌تی هه‌رێمی كوردستانى به‌رز نرخاند كه‌ ماوه‌یه‌كه‌‌ له‌ بواره‌ جیاجیاكاندا ده‌ستی پێكردووه‌.



هاوکات‌ نێچیرڤان بارزانى سوپاسی پشتگیری و هاوكارییه‌كانی به‌ریتانیای له‌ ڕۆژه‌ سه‌خته‌كاندا بۆ هه‌رێمی كوردستان كرد و پوخته‌یه‌كی ده‌رباره‌ی پرۆگرامی ڕابردووى حكوومه‌تی هه‌رێم و پرۆسه‌ی چاكسازی له‌ داموده‌زگاكانی حكوومه‌تدا خسته‌ ڕوو، هه‌روه‌ها به‌رده‌وامیی چاكسازییه‌كان و زیادكردنی سه‌رچاوه‌كانى داهاتى له‌ كه‌رتی گشتی و تایبه‌تدا دووپات كرده‌وه.



تاوتوێكردنی چه‌ند بابه‌تێكی په‌یوه‌ست به‌ دۆخی ناوچه‌كه‌ و په‌ره‌پێدانی زیاتری په‌یوه‌ندییه‌كانی نێوان هه‌رێمی كوردستان و به‌ریتانیا و هه‌وڵه‌كان بۆ بووژانه‌وه‌ی زیاتری دۆخی ئابووریی هه‌رێم، لایه‌نێكی دیكه‌ی دیداره‌كه‌ بوو.




باسنيوز