لە کۆنگرەی پارتی دەسەڵاتداری ئەڵمانیا گەنجێکی کورد نوێنەرایەتیی لاوانی جیھان دەکات
فەلاح حەسەن، جێگری سەرۆکی لاوانی دیموکراتی جیھان، سەبارەت بە بەشداریی لە کۆنگرەکەدا، گوتی: "بڕیار وایە لە ڕۆژانی ٦ بۆ ٨ ی ئەم مانگە لە شاری ھامبۆڕگی ئەڵمانیا کۆنگرەکە ببەسترێت."
گوتیشی: "خۆشم بەختەوەرم کە وەک لاوێکی سیاسیی کورد بە فەرمی و بە نوێنەرایەتیی لاوانی سیاسی و دیموکراتەکانی جیھان لەم کۆنگرە مێژوویی و مەزنەدا بەشدارم".
بڕیار وایە بۆ یەکەمینجار تێیدا ئەنجێلا مێرکل ڕاوێژکاری ئەڵمانیا ئەوە ڕابگەیەنێت کە خۆی بۆ سەرۆکی پارتەکە کاندید ناکاتەوە.
فەلاح حەسەن گوتیشی:" بەشداریی ئێمەی کورد لەم جۆرە کۆنگرانە زۆر گرنگە تا بتوانین پەیامی گەلی کوردستانیش بگەیەنینە سیاسییەکانی جیھان و لە ھەمانکاتیشدا ھەوڵی تەواو دەدەین تا دۆستایەتی زیاتر بۆ کوردستان دەستەبەر بکەین".
کۆنگرەکە لە شاری ھامبۆڕگی ئەڵمانیایە و لە سبەینێ پێنجشەممەوە 2018.12.6 دەست پێدەکات و تا شەممە 2018.12.8 دیسەمبەر بەردەوام دەبێت.
باسنیوز
