ئەمڕۆ سێشەممە د.بەشیر حەداد جێگری سەرۆكی پەرلەمانی عێراق داوای لە هاووڵاتیانیان كرد سكاڵاكانیان بۆ نووسینگەی هەولێری ئەنجوومەنی نوێنەرانی عێراق بنێرن و داوای لە نووسینگەكەش كرد سکاڵاكانی هاووڵاتیان وەربگرن و هاوکاری پەرلەمانتاران بن بۆ راپەڕاندنی کارەکانیان.

د.بەشیر حەداد لە میانی سەردانیدا بۆ نووسینگەی ئەنجوومەنی نوێنەرانی عێراق لە هەولێر، لەگەڵ بەڕێوەبەری نووسینگە و فەرمانبەران کۆبووەوە، جەختی لەوە کردەوە کە پێویستە فەرمانبەر و کارمەندان پابەندی دەوام بن و دەست بەرێسا و بنەماکانی کاری ئیدارییەوە بگرن، هەروەها کار بکەن بۆ ئاشناکردنی خەڵک بەیاسا و پڕۆژەکان.

حەداد رۆڵی گرنگی نووسینگەکانی بۆ ئەو دەزگا تەشریعیە روون کردەوە، بەتایبەت لە گەیاندنی کێشەی پارێزگاکان و داوای خەڵك و پێشکەشکردنی خزمەتگوزاری بۆیان.

لە دیدارەکە حەداد لە کاتی پێشوازی ژمارەیەک هاووڵاتی، جەختی لەوە کردەوە کە پێویستە کارمەندانی نووسینگەکانی ئەنجوومەنی نوێنەران سکاڵای خەڵک وەرگرن و رەنگدانەوە و گوتاری خەڵک بن. هەروەها هاوکاری ئەندامانی ئەنجوومەنی نوێنەران بن بۆ راپەڕاندنی کارەکانیان وەکو نوێنەری خەڵك.












باسنيوز