ئه‌مڕۆ سێشه‌ممه‌ 4/12/2018، مه‌سرور بارزانی، راوێژكاری ئەنجومەنی ئاسایشی هه‌رێمی كوردستان، پێشوازی له‌ یان كۆبیچ، نوێنه‌ری تایبه‌تیی سكرتێری گشتیی رێكخراوی نه‌ته‌وه‌یه‌كگرتووه‌كان له‌ عێراق كرد كه‌ به‌بۆنه‌ی كۆتایهاتنی ئه‌ركه‌كه‌ی له‌ عێراق سه‌ردانی كردبوو.

له‌ دیدارێكدا مه‌سرور بارزانی، هه‌وڵه‌كانی یان كۆبیچی له‌ لێكنزیككردنه‌وه‌ی هێز و لایه‌نه‌كانی عێراق به‌رز نرخاند و هیوای سه‌ركه‌وتنی له‌ ئه‌ركی داهاتوو بۆ خواست.

هه‌ر له‌و دیداره‌دا تیشكخرایه‌ سه‌ر پرۆسه‌ی سیاسیی عێراق. لەمبارەیەشەوە راوێژكاری ئه‌نجومه‌نی ئاسایشی هه‌رێمی كوردستان رایگه‌یاند: “پێمانوایه‌ ده‌رفه‌تێكی نوێ هاتۆته‌ پێش بۆ هه‌ڵدانه‌وه‌ی لاپه‌ڕه‌یه‌كی نوێی په‌یوه‌ندی و چاره‌سه‌ركردنی گشت كێشه‌كانی نێوان به‌غدا و هه‌ولێر”. هەروەها دووپاتی له‌ پشتگیریی هه‌رێمی كوردستان بۆ هه‌نگاوه‌كانی سه‌رۆك وه‌زیرانی عێراق و پێكه‌وه‌كاركردن كرده‌وه‌‌.

له‌لایەن خۆیه‌وه‌ نوێنه‌ری تایبه‌تیی سكرتێری گشتیی رێكخراوی نه‌ته‌وه‌یه‌كگرتووه‌كان له‌ عێراق سوپاسی مه‌سرور بارزانی كرد بۆ پێشكه‌شكردنی رێنوێنی و هاوكاری و ئاسانكارییه‌كان. هاوکات خۆشحاڵیی خۆی به‌بڕیاری ده‌ستنیشانكردنی مه‌سرور بارزانی بۆ سه‌رۆكایه‌تی كردنی كابینه‌ی نوێی حكوومه‌تی هه‌رێمی كوردستان ده‌ربڕی و هیوای سه‌ركه‌وتنی له‌و ئه‌ركه‌ بۆ خواست. ئەوەشی دووپات کردەوە ‌ كه‌ كاری له‌ پێشینه‌ی نه‌ته‌وه‌ یه‌كگرتووه‌كان له‌ عێراق هاوكاریكردنی چاره‌سه‌ركردنی كێشه‌كانی نێوان به‌غدا و هه‌ولێره‌، به‌تایبه‌تی كێشه‌كانی په‌یوه‌ست به‌ مادده‌ی 140ی ده‌ستوور و ئاماژه‌ی به‌وه‌دا، كه‌ نوێنه‌رایه‌تی نه‌ته‌وه‌ یه‌كگرتووه‌كان له‌سه‌ر ئه‌و بابه‌ته‌ له‌ ئه‌ركی خۆی به‌رده‌وام ده‌بێت.

پێشهات و هه‌ڵسه‌نگاندنی ئه‌گه‌ره‌كان و ره‌وشی سیاسی و ئابووری ناوچه‌كه‌ ته‌وه‌رێكی دیكه‌ی دیداره‌كه‌ی نێوان هه‌ردوولا بوو.












باسنیوز