بە بۆنەی کۆچی دوایی جۆرج بوشی باوک، سەرۆکی پێشووتری ئەمریکا، نێچیرڤان بارزانی، سەرۆک وەزیرانی ھەرێمی کوردستان پرسەنامەیەکی ئاڕاستەی خانەوادەکەیان و جۆرج دەبلیوو بوش، سەرۆکی پێشووتری ئەمەریکا کرد.

ئەمڕۆ یەکشەممە 2/12/2018، نێچیرڤان بارزانی بە بۆنەی کۆچی دوایی جۆرج بوشی باوک پرسەنامەیەکی بڵاو کردەوە، تێیدا دەڵێت: "گەلی کوردستان ڕێز و پێزانینێکی زۆری بۆ ڕۆڵی سەرۆک بوشی باوک ھەیە کە ساڵی 1991 ڕۆڵی سەرەکی لە سەپاندنی ناو‌چەی دژەفرین لە ھەرێمی کوردستان بینی و خەڵکی کوردستانی لە ستەم و دوژمنکارییەکانی ڕژێمی بەعس پاراست و بووە ھۆی بووژانەوەی ھەرێمی کوردستان".

ھەر لە پرسەنامەکەدا سەرۆک وەزیرانی ھەرێمی کوردستان باسی لەوەش کرد: "سەرۆک بوشی باوک بۆ ھەمیشە بە ‌زیندوویی لە یادەوەریی گەلی کوردستاندا دەمێنێتەوە".




دەقی پەیامەکەی نێچیرڤان بارزانی، سەرۆک وەزیرانی ھەرێمی کوردستان

بەبۆنەی کۆچی دواییی سەرۆکی پێشووتری ئەمەریکا جۆرج بوشی باوکەوە، پرسە و سەرەخۆشی لە خانەوادەی بەڕێزیان و بەتایبەتی سەرۆکی پێشووتری ئەمەریکا بەڕێز جۆرج دەبلیوو بوش و دۆست و ھاوڕێیانی دەکەم. لەم کاتە سەختانەدا ھاوسۆز و ھاوخەمیانم، خوای گەورە دڵنەوایی و سەبووریی ھەمووان بداتەوە.

گەلی کوردستان ڕێز و پێزانینێکی زۆری بۆ ڕۆڵی سەرۆک بوشی باوک ھەیە کە ساڵی 1991 ڕۆڵی سەرەکی لە سەپاندنی ناو‌چەی دژەفرین لە ھەرێمی کوردستان بینی و خەڵکی کوردستانی لە ستەم و دوژمنکارییەکانی ڕژێمی بەعس پاراست و بووە ھۆی بووژانەوەی ھەرێمی کوردستان. سەرۆک بوشی باوک بۆ ھەمیشە بە ‌زیندوویی لە یادەوەریی گەلی کوردستاندا دەمێنێتەوە.

نێچیرڤان بارزانی
سەرۆک وەزیرانی ھەرێمی کوردستان
2ی دیسەمبەری 2018




باسنیوز