ئەنجومەنی سەرکردایەتیی یەکێتیی نیشتمانیی کوردستان کۆ دەبێتەوە و چەند پرسێک تاوتوێ دەکات.



بەپێی هەواڵێکی ماڵپەڕی فەرمیی یەکێتی، ئەمڕۆ شەممە 1/12/2018، ئەنجومەنی سەرکردایەتیی یەکێتی لە سلێمانی کۆ دەبێتەوە.



کۆبوونەوەکە تەواوکاریی کۆبوونەوەی ئاسایی ئەنجومەنەکەیە، کە رۆژی هەینی 30/11/2018 بە سەرپەرشتیی کۆسرەت رەسوڵ عەلی، جێگری سکرتێری گشتیی یەکێتی، ئەنجام درا.



لەو کۆبوونەوەیەی ئەمڕۆدا، تاوتوێی دۆخی سیاسیی لە عێراق، پێکهێنانی کابینەی نوێی حکوومەتی هەرێمی کوردستان و چەند پرسێکی پەیوەندیدار بە ناوخۆی حزبەکە، دەکرێ.



رۆژی 30ـی ئەیلوولی 2018، هەڵبژاردنی خولی پێنجەمی پەرلەمانی کوردستان ئەنجام درا و رۆژی سێشەممە 30/10/2018، ئەنجومەنی باڵای دادوەری لە هەرێمی کوردستان ئەنجامەکانی پەسەند کرد.



ژمارەی کورسیی لایەنەکان لە کۆی 100 کورسیی پەرلەمان لە خولی پێنجەم:



- پارتی دیموکراتی کوردستان، 45 کورسی.

- یەکێتیی نیشتمانیی کوردستان، 21 کورسی.

- بزووتنەوەی گۆڕان، 12 کورسی.

- نەوەی نوێ، 8 کورسی.

- کۆمەڵی ئیسلامی، 7 کورسی.

- بەرەو ئیسڵاح (یەکگرتوو و بزووتنەوەی ئیسلامی)، 5 کورسی.

- ئازادی، 1 کورسی.

- سەردەم، 1 کورسی.



پێکهاتەکان (ژمارەی کورسییەکانیان جێگیرە):



- تورکمان، 5 کورسی.

- مەسیحی و کلدان ئاشووری، 5 کورسی.

- ئەرمەن، 1 کورسی.



باسنیوز