یەکێک لە ڕۆژنامەنووسان و چالاکانی مافی مرۆڤی دانیشتووی شاری سنە، لەلایەن دەزگای دادوەریی ئێرانەوە حوکمی بەندکرانی بۆ بڕایەوە.

ڕێکخراوی مافی مرۆڤی (هەنگاو) لەمبارەوە بڵاوی کردووەتەوە ئیجلال قەوامی، چالاکی مافی مرۆڤ و ڕۆژنامەنووسی خەڵکی سنە، بەبێ ئامادەبوونی خۆی لەلایەن لقی 109ی دادگای تاوانەکانی ئەو شارەوە حوکمی ٨ مانگ بەندکرانی بەسەردا سەپێندراوە.

ئەو حوکمە بە تۆمەتی "بڵاوکردنەوەی درۆ و دەلەسە بە مەبەستی تێکدانی بیروڕای گشتی" بەسەر ناوبراودا سەپێندراوە.

بەپێی ئەو حوکمە، ئیجلال قەوامی هەتا ٢٠ ڕۆژ دوای ڕاگەیاندنی فەرمیی حوکمەکە، دەتوانێ ناڕەزایی خۆی لەو بڕیارە تۆمار بکات و حوکمەکە بگەڕێنێتەوە بۆ دادگای پێداچوونەوەی شاری سنە.

یەکم دانیشتنی دادگاییکردنی ئیجلال قەوامی لە هاوینی ئەمساڵ لە لقی دووەمی کۆمەڵگەی دادوەریی بێهشتی شاری سنە بەڕێوە چوو و دواتر بە دانانی بارمتەی ٢٠ ملیۆن تمەنی بە شێوەی کاتی ئازاد کرا.










باسنيوز