چەند چەکدارێکی نەناسراو لە سنووری پارێزگای کەرکووک نارنجۆکێکیان هەڵدایە ماڵی هاووڵاتییەکی کورد.

محەمەد فایەق، بەرپرسی پێشووی راگەیاندنی قایمقامییەتی خورماتوو لە هەژماری تایبەتیی خۆی لە تۆڕی کۆمەڵایەتیی (فەیسبووک) رایگەیاندوو، رووداوەکە کاتژمێر 12:45 خولەکی بەرەبەیانی رۆژی یەکشەممە 2/9/2018 لە گوندی (فەریق ئاوا)ی ناوچەی حەفتەغاری سەر بە شارۆچکەی داقووق لە سنووری پارێزگای کەرکووک رووی داوە.

محەمەد فایەق هەروەها رایگەیاندووە، نارنجۆکەکە هەڵدراوەتە ماڵی ئومێد مەندیل حەسەن و جگە لە زیادی ماددی زۆر، هیچ زیانێکی گیانی لێ نەکەوتووەتەوە.

دوای داگیرکردنی کەرکووک و ناوچە کوردستانییەکانی دەرەوەی ئیدارەی هەرێمی کوردستان لەلایەن میلیشیاکانی حەشدی شەعبییەوە، دەیان گرووپی چەکداریی توندڕەو و تاوانکاری لەو ناوچانە دروست بوون و چەکدارانی رێکخراوی تیرۆریستی داعشیش دەستیان بە کردەی تیرۆریستی کردووەتەوە.

حەشدی شەعبی و هێزە عێراقییەکان توانای پاراستنی ئەو ناوچانە و رووبەڕووبوونەوەی گرووپە چەکدارییە توندڕەو، تیرۆریستی و تاوانکارییانەیان نییە.

بەپێی زانیارییەکان، ئێستا لە گوندەکانی دارا، مەنسور، فە ریق ئاوا و عەلیی کوردنشین لە ناوچەی حەفتەغار، گەنجان بە شەوان و بەچەکی خۆیان ئێشکگریی بۆ پاراستنی گوندەکانیان، چونکە ھیچ ھێزێکی ئەمنی لە سنوورەکەیان نەماوە و ھەڕەشەی تیرۆریستانیشیان لەسەرە، بەڵام پێش 16ـی ئۆکتۆبەری رابردوو ھێزەکانی پێشمەرگە ئەو سنوورەیان دەپاراست.

ڕۆژی 16ی ئۆكتۆبه‌ری 2017، کەرکووک، خورماتوو و ناوچەکانی دەوروبەری كه‌وتنە ژێر ده‌ستی میلیشیاكانی حه‌شدی شه‌عبی و هێزه‌كانی عێراق، دواتر هه‌ریه‌ك له‌ كۆسره‌ت ڕه‌سوڵ عه‌لی، جێگری یه‌كه‌می سكرتێری گشتیی یه‌كێتی و شێخ جه‌عفه‌ر مسته‌فا، ئه‌ندامی مه‌كته‌بی سیاسی و فه‌رمانده‌ی یه‌كه‌ی 70ی هێزی پێشمه‌رگه‌ی كوردستان، ئاشكرایان كرد كه‌ گرووپێكی نێو یه‌كێتیی نیشتمانیی كوردستان له‌مه‌دا به‌رپرسیارن و ڕێككه‌وتنی ژێربه‌ژێریان له‌گه‌ڵ میلیشیاكانی حه‌شدی شه‌عبی و هێزه‌كانی عێراق كردووه‌ و به‌و هۆیه‌وه‌ سه‌دان پێشمه‌رگه‌ و هاووڵاتی شه‌هید و بریندار بوون و نزیكه‌ی 200 هه‌زار كه‌سیش ئاواره‌ بوون.










باسنيوز