دبیرەوەریا 30مین سالڤەگەرا ئەنفالا بەهدیناندا، بۆ ئێکەم جار دێ (13) رووفاتێن ئەنفالکریێن بەهدینان ل گورستانەکا تایبەتدا ئێنە ڤەشارەتن، کۆ بەرى نوکە چ جهێن تایبەت بۆ رووفاتێن ئەنفالکریێن ڤێ دەڤەرێ نەبوون و ئەنفالکریێن دەڤەرا بەهدینان (2000) کەسن.

ب بەرهەڤبوونا سەرۆکێ حکومەتا هەرێما کوردستانێ (نیجیرڤان بارزانى)، دێ بیرەوەریا 30مین سالڤەگەرا ئەنفالا بەهدینان ل کەلا نزارکێ ل دهۆکێ ئێتە ساخکرن و دێ (13) رووفاتێن ئەنفالکریێن بەهدینان ل گورستانەکا تایبەتدا ئێنە ڤەشارەتن.

بێوار حاجى بەندى، نوونەرێ رێکخراوا 88 یا ناساندنا تاوانێن ئەنفالێ بۆ مالپەرێ فەرمیێ پارتى دیموکراتى کوردستان گۆت:" بەرى چەند سالەکا رووفاتێن 13 ئەنفالکریێن بەهدینان ل گورستانا شاخکێ ل دهۆکێ هاتبوونە دیتن، حکومەتا هەرێمێ ئەو رووفاتە رەوانەیى هەولێر کر بوون و تا نوکە ناسنامەیا وان نەهاتیە زانین، بەلێ چەند جارا مە ژحکومەتا هەرێمى خواستیە گورستانەکا تایبەت بۆ رووفاتێن ئەنفالکریێن بەهدینان ل دهۆکێ هەبیت، ژبەر ڤێ ئێکێ ژى جهەکێ تایبەت بۆ ڤان رووفاتان ل تەنێشت کەلا نزارکێ هاتیە دەستنیشانکرن و دێ ئەڤرۆ ئیڤارى ب رى و رەسمەکێ تایبەت ئەڤ رووفاتە ئێنە خاکسپاردن، جونکى ئەنفالکریێن دهۆکێ لوێ کەلێ کومڤە کربوون و لوێرێ شەهیدکرن".

ل سالا 1988ێ، ئەنفالکرنا دەڤەرا بەهدینان لسەر دەمێ رژێما بەعس یا ژناڤچوویا ل عیراقێ دەستپێکر، ژبۆ ناڤبرنا میللەتێ کورد، رەجەب گیزى، رێڤەبەرێ گشتى یێ شەهید و ئەنفالکریان ل دهۆکێ بۆ مالپەرێ فەرمیێ پارتى دیموکراتى کوردستان ئاخفت:" بۆ ئێکەم جارە دێ 13 رووفاتێن ئەنفالکریێن بەهدینان ل دهۆکێ ئێنە ڤەشارتن، کۆ بەرى نوکە چ جهێن تایبەت بۆ رووفاتێن ئەنفالکریێن ڤێ دەڤەرێ نەبوون".

رێڤەبەریا گشتى یا کارۆبارێن شەهیدان و ئەنفالکریان ل دهۆکێ ب هەڤکارى دگەل پارێزگەها دهۆکێ، دێ رابن ب خاکسپاردنا 13 رووفاتێن ئەنفالکریێن بەهدینان ل دهۆکێ.
kdp-