سه‌رۆكێ ژوورا بازرگانى و پیشه‌سازى ل پارێزگه‌ها دهۆكێ راگه‌هاند كو ل دووڤ بریارا ئه‌نجوومه‌نێ بالا یا وه‌به‌رهێنانێ، هه‌موو پرۆژه‌یێن وه‌به‌رهێنانێ و یه‌كەیێن ئاكنجیبوونێ یێن ژ ئه‌گه‌رێ قه‌یرانا دارایى هاتینه‌ راگرتن، دێ ده‌ستبكاربنه‌ڤه‌.

شێخ ئه‌یاد حه‌سه‌ن، سه‌رۆكێ ژوورا بازرگانى و پیشه‌سازى ل پارێزگه‌ها دهۆكێ، دیار كر، ژ ئه‌گه‌رێ قه‌یرانا دارایى و شه‌رێ داعش ل سالا 2014 و هه‌تا نها هژماره‌كا زۆر یا پرۆژه‌یێن وه‌به‌رهێنانێ و یه‌كەیێن ئاكنجیبوونێ هاتبوونه‌ راگرتن و ئاریشه‌یێن مه‌زن بۆ هاوولاتیان په‌یداببوون، به‌لێ نها ئه‌نجوومه‌نێ بالا یا وه‌به‌رهێنانێ بریار دایه‌ ئه‌و پرۆژه‌ هه‌موو جاره‌كا دى ده‌ستبكاربنه‌ڤه‌.

ئاشكرا ژى كر، ماوێ ساله‌كێ یه‌ ئالۆگۆرا بازرگانى ل هه‌رێما كوردستانێ به‌ره‌ڤ باشیێ دچیت و یا ئاسایى دبیته‌ڤه‌ و ب تایبه‌ت ئالۆگۆرا بازرگانى دناڤبه‌را هه‌رێمێ و توركیا دا و هاتنا كۆمپانیێن توركى بۆ دهۆكێ به‌ره‌ڤ زێده‌بوونێ نه‌ و نها 300 كۆمپانیێن بیانى پرۆژه‌یێن مه‌زن یێن بازرگانى ل پارێزگه‌ها دهۆكێ هه‌نه‌.

شێخ ئه‌یاد حه‌سه‌ن خویا كر، كو ئێك ژ پلانێن حكوومه‌تا هه‌رێما كوردستانێ ئه‌وه‌ كو ئاسانكاریان بۆ كۆمپانیێن بیانى بكه‌ت بۆ هندێ بهێنه‌ هه‌رێما كوردستانێ و گه‌شه‌یا ده‌ڤه‌رێ یا بازرگانى و پیشه‌سازى بكه‌ن.










باسنیوز