هندهك نێچیرڤان رووباران بۆ نێچیرا ماسیان كارهبا دكهن
سهمیع سهدیق ماسیگرهكێ شێلادزێ یه ل سنوورێ قهزا ئامێدیێ ) گۆت: "بكارئینانا ههموو جۆرێن تۆرا و بومبه و تهقهمهنى و ماددێن ژههراوى بكارئینانا كارهبێ بۆ گرتنا ماسیان بوویه ئهگهر سامانێ ماسیان ل رووبارێن سنوورێ دهڤهرا ئامێدیێ گهلهك كێم بن، بهرى نها ههتا 30 كگم ماسیان مه دگرتن بهلێ نها نێزیكێ پێنج كگم ماسیان ئهم دگرین".
زێدهتر گۆت: "بۆ درۆستكرنا ههر تۆرهكا ماسیان ئهم پێدڤى ب 10 بۆ 12 هزار دیناراینه و بۆ كرینا چۆپهكێ ژى ئهم پێدڤى ب 30 بۆ 50 هزار دیناراینه، چێكرنا تۆرا ل سهر ماسیگران دمینیت، ئهز ب خوه تۆرێن 25م یێن ڤێدا بهردانێ درۆست دكهم، ماسیگر تۆرێن ئێك تبل ههتا ههشت تبل و زێدهتر ژى درۆست دكهن، بهرێ ب شێوهیهكێ گشتى تۆرێن دوو تبل و سێ تبل ل رووبارێن دهڤهرێ ب ههردوو شێوازێن ڤێدا بهردان و دانان دهێنه بكارئینان، بهلێ شێوازێ ڤێدا بهردان باشتره، ژ بهر كو ماسیێ وان بلهزه و مرۆڤ ل گهل خوه دئینیت مال، بهلێ شێوازێ دانان یێ گیرویه و پێدڤیه تۆر بهێنه دانان بۆ رۆژا پاشتر".
ئهیوب رێكانى ئهو ژى ماسیگرهكێ دهڤهرێ یهگۆت: "ئهم ل ههردوو رووبارێن شین و رووبارێ زێ ماسیان دگرین، ل سنوورێ مه ب زۆر رێك و شێوازان دهێنه گرتن، بهلێ باشترین شێواز ژى بكارئینانا تۆرایه، ژ بهركو رێیێن دى زیانێن زور مهزن ب ماسیان دكهڤن، ههر بۆ نموونه ئهگهر كارهبا بۆ گرتنا ماسیان بهێته بكارئینان دێ ههموو جۆرێن ماسیێن بچووك و مهزن ههتا خوه گیانهوهرێن دن ژى ل گهل هێنه كوشتن ڤێ یهكێ ژى كارتێكرنهكا زۆر ل سهر كێمبوونا سامانێن ماسیان ههیه".
ژلایهكێ دنڤه موقهدهم ئیبراهیم ئاكرهى رێڤهبهرێ دارستان و پاوان و ژینگهها ئاكرێ دیاركر، ماسیگر و وهلاتیێن سنوورێ قهزا ئاكرێ و دهڤهرێن دن ب چوار شێوازان ماسیان دگرن و ههتا نها ئهو نهشیاینه ماسیگر و وهلاتیان ل ههڤدوو جودا بكهن و بۆ (باس) گۆت: (بكارئینانا ههموو جۆرێن تۆرا و ماددێن ژههراوى و بۆمبه و كارهبا و كومكۆژى و جینوسایدكرنا ماسیان بوویه سهدهم ماسى ب رهنگهكێ زۆر بهرچاڤ رووبارێن سنوورێ قهزا ئاكرێ ب تایبهتى رووبارێ زێ مهزن كو ل گهلیێ بالندا دهست پێ دكهت و دچیته بێخمێ و كهلهك و نێزیك مووسل زۆر كێمكرینه".
عهدنان سیتهیى كو ئێكه ژ بكرێن ماسیان بازارێ شێلادزێ گۆت: "ماسى رووبارێن دهڤهرا بارزان و شێلادزێ دهێنه بازارێن شێلادزێ و ئهم ل ڤێره كیلویێ ب پێنج هزار دینار بۆ 12 هزار و 500 دیناران دفروشین، ئهڤ بوهایه بهرامبهر سالێن بۆرى كێمتره و بهرى نها كیلو ب حهفت هزار و 500 بو 12 هزار و 500 و پتر د فروتن، ئهڤ یهكه ژى دزڤریت بۆ درۆستبوونا قهیرانا دارایى و گیروبونا مۆچه و نهبوونا كارى".
رێڤهبهرێ دارستان و پاوان و ژینگهها ئاكرێ دیاركر ژى كو قهیرانا دارایى بوویه ئهگهر ماسیگر زێدهتر بن و زێدهتر ژى زێدهگاڤى سهر ژینگهها ماسیان بهێتهكرن و گۆت ژى: "پێدڤیه لایهنێن شولهژێ كار ل سهر كێمكرنا زێدهگاڤیێن ل سهر ژینگههێ بكهن ب رێیا جوداكرنا ماسیگران ژ وهلاتیان و دانا كارتهكا تایبهت بۆ ماسیگران و سهندیكایهكا تایبهت د ڤى واریدا بهێته درۆستكرن، نها ب تنێ رێیا سامانێ ماسیان بهێته پاراستن ئهوه رێكهفتى 21/3 ههتا 30/6 ماسى دهێنه قهدهغهكرن، ئهو ژى ژبهر دانانا خهرزێ خوه، ههر ماسیگرهك د ڤى دهمى دا بهێتهكرن دێ ب رێیێن قانوونى سهرهدهرى ل گهل هێتهكرن".
ژبلى رووبار چهند پرۆژهیهكێن ماسیان ژى سنوورێ قهزا ئامێدیێ هاتینه چێكرن، بهلێ خهلك پتر حهژ ماسیێ رووباران دكهت، د ڤى دهربارى دا دلوڤان شاجى كو ئێكه ژ خودانێن پرۆژێن ماسیان ل شێلادزێ گۆت: "سهرهراى ب شێوهیهكێ زانستى و باش ماسى پرۆژهیێن دهڤهرێ دهێنه خودانكرن و تێرا ههموو دهڤهرێ ئهم ماسیان بهرههم دئینین ، بهلێ خهلك پتر حهز ماسیێن رووباران دكهن، نها كیلویا ماسیێن پرۆژهیان ب شهش هزار دیناران دهێنه فروتن و كێمتر وان نینه یێن كو ل رووبارى دهێنه ب خودانكرن، ژ بهركو ماسیێ پرۆژهیان ژى نیڤا خوارنا خوه پتر ژ حهزێن ماسیان وهردگرن ب رهنگهك سرۆشتى و نیڤا دن ل سهر خوارنا پرۆژهى ب خوه دهێته ب خودانكرن".
ماسى ل سنوورێ قهزایێن ئامێدیێ و ئاكرێ و مێرگهسوور ههرسێ رووبارێن زیێ مهزن، رووبارێ شین ، رووبارێ رێزان ههنه، ئهڤه سهرهراى چهند تایهكێن دن یێن رووباران وهكو سپنه و مارك.
bas news-
