ئه‌ندامێكى په‌رله‌مانى كوردستان، ڕای ده‌گه‌یه‌نێت، تائێستا ئه‌نجامى لێكۆڵینه‌وه‌ى ئه‌و لیژنه‌یه‌ ده‌رنه‌چووه‌ كه‌ بۆ لێكۆڵینه‌وه‌ له‌ ته‌قینه‌وه‌كانى چه‌ك و ته‌قه‌مه‌نى، پێكهێندراوه‌.


شیلان جه‌عفه‌ر، سه‌رۆكى لیژنه‌ى كاروبارى پێشمه‌رگه‌ له‌ په‌رله‌مانى كوردستان ڕاگه‌یاند: "له‌ماوه‌ى چه‌ند مانگى ڕابردوودا نزیكه‌ى پێنج كۆگاى چه‌ك و ته‌قه‌مه‌نى له‌ناوچه‌ جیاجیاكانى هه‌رێمى كوردستان ته‌قینه‌وه‌، بۆیه‌ بۆ زانینى هۆكاره‌كان، لیژنه‌ى لێكۆڵینه‌وه‌ پێكهێندرا".


ئه‌و په‌رله‌مانتاره‌ ئاشكراشى كرد، كه‌ تائێستا ئه‌نجامى لێكۆڵینه‌وه‌كان ئاشكرا نه‌كراون، بۆیه‌ به‌نیازن سه‌ردانی لیژنه‌كه‌ بكه‌ن و دوا زانیاریی له‌وباره‌یه‌وه‌ وه‌ربگرن.


هه‌روه‌ها گوتیشی: "كۆگاكانى چه‌ك و ته‌قه‌مه‌نى وه‌زاره‌تى پێشمه‌رگه‌ به‌شێوه‌ى زانستى دروست كراون و مه‌ترسى ته‌قینه‌وه‌یان له‌سه‌ر نیی، به‌ڵام ئه‌و كۆگایانه‌ى ته‌قیونه‌ته‌وه‌ سه‌ر به‌ وه‌زاره‌تى پێشمه‌رگه‌ نین و كۆگاى یه‌كه‌كانن، كه‌ زیاتر ئه‌و چه‌كانه‌یان تێدا هه‌ڵگیراوه‌، له‌ شه‌ڕى داعش گیراون و به‌شێوه‌ى نازانستى هه‌ڵگیراون".
bas news-