سەنتەری دیموکراسی بۆ مافەکانی مرۆڤ لە کوردستان رایدەگەیەنێت، کە یەکینەکانی پاراستنی گەل (یەپەگە) رێگا نادا هاووڵاتییانی شاری عەفرین لە رۆژئاوای کوردستان لە شارەکە بچنە دەرەوە.



بەپێی راگەیەندراوێکی سەنتەرەکە، ، تۆپباران و گەمارۆدانی عەفرین لەلایەن سوپای تورکیا و گرووپە توندڕەوەکانی ئۆپۆزیسیۆنی سووریا بۆ سەر عەفرین بەردەوامە.



سەنتەری دیموکراسی بۆ مافەکانی مرۆڤ لە کوردستان جەختی لەوە کردووەتەوە، هاووڵاتییانی عەفرین هەوڵی خۆ دەربازکردن لە شەڕ دەدەن و بەرەو ناوچەکانی ژێر دەسەڵاتی رژێمی سووریا بچن، بەڵام ”یەپەگە رێگا بە هاووڵاتییان نادات لە شارەکە بچنە دەرەوە“.



ئەو سەنتەرە ئاماژەی بەوەش کردووە، کە بەهۆی شەڕ و تۆپبارانی سوپای تورکیاوە، لە رۆژی دووشەممە 12/3/2018 (رۆژی 52ـینی هێرشەکە)، چوار شەڕڤانی یەپەگە و چوار هاووڵاتی، گیانیان لەدەست داوە.



لە رۆژی 20/1/2018ـەوە، سوپای ئازادی ئۆپۆزیسیۆنی سووریا و سوپای تورکیا بە بەکارھێنانی ھێزی ئاسمانی، زەمینی و تۆپخانە، لەژێر ناوی ئۆپەراسیۆنی (چلە زەیتوون)، ھێرشیان کردووەتە سەر شاری عەفرین لە رۆژئاوای کوردستان.




باسنیوز