بریارده‌رێ لێژنا ئاسایشێ ل جڤاتا پارێزگه‌ها نه‌ینه‌وا دیاركركو گرتیێن داعش به‌رامبه‌ر كوژمێن پاره‌ ژ زیندانێن مووسل دهێنه‌ ئازادكرن. ئه‌ڤ ده‌نگۆ زۆر به‌ربه‌لاڤبوویه‌ ل ده‌ڤه‌رێ، هه‌تا نۆكه‌ چوو ڤه‌كۆلین دگه‌ل ده‌زگه‌هێن ئه‌منى ل مووسل نه‌هاتیه‌ كرن ژبه‌ر ڤێ كه‌یسێ.

هاشم بریفكانى، بریارده‌رێ لێژنا ئاسایشێ ل جڤاتا پارێزگه‌ها نه‌ینه‌وا دیاركر: "ئه‌م دلگران بووینه‌ ژبه‌ر ئازداكرنا ئه‌ندامێن داعش ژ زیندانێن ده‌ڤه‌رێ. هه‌تا نۆكه‌ چوو به‌لگه‌نامه‌یێن دروست ده‌ست مه‌ نه‌كه‌ڤتنه،‌ چه‌وا وكینه‌ دهێنه‌ ئازادكرن، لێ گومانه‌ك مه‌زن بۆ مه‌ دروست بوویه‌ ئه‌ندامێن داعش ب پاره‌ یێ دهێنه‌ ئازادكرن و حكومه‌تا عێراقى وئیدارا مووسل یێن هاتینه‌ ئاگه‌هداركرن ژبه‌ر هه‌بوونا خەمساری ل ده‌زگه‌هێن ئه‌منى ل ده‌ڤه‌رێ وپێدڤیه‌ ڤه‌كۆلین بهێنه‌ كرن وكه‌سێن خەمساری كربیت، بهێته‌ سزادان".

خویا ژى كر: "شانه‌یێن نڤستى یێن داعش هێشتا بنبر نه‌بووینه‌. به‌رى چه‌ند رۆژان شانه‌كا نڤستى یا پێكهاتى ژ 17 تیرۆرستێن داعش ب چه‌كێن قورس وسڤك ڤه‌ ل مووسل هاتنه‌ ده‌سته‌سه‌ركرن. پێدڤیه‌ هه‌موو هه‌ولدان بهێنه‌ كرن بۆ بنبركرنا تیرۆرستێن داعش".









باسنيوز