ئەندامێكی سەركردایەتیی بزووتنەوەی ئیسلامیی کوردستان ڕای دەگەیەنێت: "خۆپیشاندانەكان دەستی لایەنێکی تێدایە و دەیەوێت دۆخەكە ئاڵۆزتر بكات".

سەلام كەریم، ئەندامی سەركردایەتیی بزووتنەوەی ئیسلامیی کوردستان، لەمبارەوە ڕایگەیاند: "ئەو خەڵكانەی کە خۆپیشاندان دەكەن و دەبینرێن خەڵكی مافخوراون، بەڵام بە بەڵگەوە لەلامانە دەستی لایەنێکی تێدایە و دەیەوێت دۆخەكە ئاڵۆزتر بكات و بارەگای حزبەكان لە تەواوی شار و شارۆچكەكانی كوردستان بسووتێندرێن".

ئەو ئەندامەی سەركردایەتیی بزووتنەوە گوتیشی: "خۆپیشاندان مافێكی ڕەوای هەموو هاووڵاتییەكە لەپێناوی باشبوونی بژێو و ئازادیدا، بەڵام بەداخەوە ئەوەی ئەمڕۆ دەیبینین بەرنامەڕێژیی بۆ نەكراوە، بۆیە هێرش دەكەنەسەر بارەگاكان".

ئەو ئەندامەی سەركردایەتی بزووتنەوەی ئیسلامی هیواشی خواست كە "خۆپیشاندانەكان توندوتیژی لێنەكەوێتەوە".









باسنيوز