كارگێڕی لقی سێی پارتی دیموكراتی كوردستان لە كەركووك ئاشكرای دەكات لە كەركووك میلیشیاكانی حەشدی شەعبی گوشارێكی زۆر دەخەنە سەر دانیشتوانی گەڕەكە كوردنشینەكان.



ئەمڕۆ سێشەممە 19/12/2017، كاوە ئەحمەد، كارگێڕی لقی سێی پارتی لە كەركووك، ڕاگەیاند: "میلیشیاكانی حەشدی شەعبی لە سنووری گوندی "كەڵۆز"ی سەر بە كەركووك و بە دیاریكراوی لەنێو زەوییە كشتوكاڵییەكانی جووتیارانی ئەو سنوورە، ئەو میلیشیانە تۆپخانەكانیان لەنێو ئەو زەوییانەدا داناوە و خەڵكی ئەو سنوورەش حەشدی شەعبی وەك داگیركار تەماشا دەكەن و وەك كاردانەوەیەك ژمارەیەك هاووڵاتییش وەك پەیامێك بۆ ئەوەی ئەو میلیشیایانە ئەو سنوورە چۆڵ بكەن، هێرشیان كردووەتە سەر میلیشیاكان".



ئەو بەرپرسەی پارتی گوتیشی: "ماوەیەكە میلیشیاكانی حەشدی شەعبی گوشارێكی زۆری سەربازی دەخەنە سەر گەڕەكە كوردنشینەكانی كەركووك، بەداخەوە گرووپێكی دەمامكداریش پەیدا بوونە كە ڕەنگە كڕابنە چاوساغییان و سووكایەتی بە خەڵك دەكەن".



كارگێڕی لقی سێی پارتی لە كەركووك ڕوونیشی كردەوە، ئێستا شەوانە حاڵەتی بەرخودان لە بەرامبەر میلیشیاكانی حەشدی شەعبی لە كەركووك هەیە و خۆبەخشەكان بەرپەرچی حەشدی شەعبی دەدەنەوە، چونكە خەڵكی كەركووك ئەو داگیركارییەیان پێ قبووڵ ناکرێت".



كاوە ئەحمەد، ئاماژەی بۆ ئەوەش كرد: "شارێك ئەگەر زرێپۆش لەنێو كووچە و كۆڵانەكانیدا بێت و بە سەربازی بكرێت، ئیتر هیچ دڵنیاییەكی تێدا نامێنێت".



ڕۆژی 16ی ئۆكتۆبەری ڕابردوو، میلیشیاكانی (حەشدی شەعبی، سوپای پاسدارانی ئێران و حزبوڵای لوبنانی) بەڕێككەوتن لەگەڵ گرووپێكی خیانەتكار، پەلاماری كەركووك و خورماتوو و خانەقینیان دا و دەستیان بە سەردا گرت و سەدان هاووڵاتیی كوردیان شەهید و بریندار كرد و نزیكەی 200 هەزار كەسیش لەو سنوورانە ئاوارە بوون.






باسنيوز