ئەیاد عەللاوی، جێگری سەرکۆماری عێراق هۆشداری دەدات لەوەی کە گەلی کوردستان نەکەونە داوی ئەجێندای پیلانی فیتنە و ئاژاوەگێڕی، کە خێری بۆ هەرێمی کوردستان ناوێ.



هاوکات عەللاوی داوا لە حزبەکان و ڕێکخراوەکانی کۆمەڵگای مەدەنی کوردستان دەکات، کە ددان بە خۆیاندا بگرن و ئاو بە ئاشی پیلان و فیتنەگێڕییەکاندا نەکەن.



لە میانی لێدوانێکی ڕۆژنامەوانیدا، جێگری سەرکۆماری عێراق ڕوونی کردەوە، هاووڵاتییانی کوردستان کراونەتە قوربانی بەردەوامیی قەیرانی نێوان حکوومەتی فیدڕاڵی و حکوومەتی هەرێمی کوردستان.



عەللاوی داوا دەکات کە پەلە بکرێ لە دۆزینەوەی ڕێگاچارەیەک بۆ ناکۆکییەکانی نێوان هەولێر و بەغدا و دابینکردنی مووچەی فەرمانبەران، کە دواکەوتنی مووچە کاریگەریی نەرێنی لە سەر ژیان و گوزەرانیان هەیە.



هەروەها داوا لە بەغدا دەکات کە لە ئاست ڕووداوەکانی هەرێم بە بەرسیارێتیی خۆی هەڵبستێت و سەرنجی بەغدا بۆ ئەوە ڕادەکێشێ، کە ئەم دۆخە دەرەنجامی خراپی لێ دەکەوێتەوە و تەنیا لە سنووری کوردستان نامێنێتەوە.



باسنیوز