ژمارەیەک زانای ئایینیی ئیسلامی لە شاری سۆران، سەنگەرەکانی هێزەکانی پێشمەرگەی کوردستان لە میحوەری تلسقۆف بەسەر دەکەنەوە.

ئەو زانا ئیسلامییانە، کە رۆژی یەکشەممە 2ـی تشرینی یەکەمی 2016 بە سەرۆکایەتیی وەیسی سەعید، بەڕێوەبەری ئەوقافی سۆران و بەبۆنەی سەری ساڵی کۆچییەوە سەردانی هێزەکانی پێشمەرگەیان کرد، شەڕی هێزەکانی پێشمەرگەیان لە دژی رێکخراوی توندڕەوی داعش بە جیهاد و بەرگریکردن لە خاک و دینی گەلی کوردستان وەسف کرد.

زاناکان تیشکیان خستە سەر ئازایەتی و قارەمانێتیی پێشمەرگە، کە بوونەتە مایەی شانازی بۆ ھەموو لایەک و لە جیاتی ھەموو مرۆڤایەتیی شەری دڕندەترین گرووپی تیرۆریستیی داعش دەکەن.

مامۆستا ئاینییەکان پاڵپشتیکردنی هاووڵاتییانیان لە هێزەکانی پیشمەرگە بە ”ئەرکی ئایینیی و نەتەوەیی“ داناوە.

دوای هەرەس پێهێنانی سوپا و هێزە ئەمنییەکانی عێراق لە مانگی حوزەیرانی 2014 چەکدارانی داعش زۆربەی شارەکانی پارێزگاکانی نەینەوا، دیالە، سەڵاحەدین و ئەنباریان لە عێراق داگیر کرد و هێزەکانی پێشمەرگە ئازایانە بەرگرییا لە خاکی کوردستان کرد و وێڕای رزگارکردنەوەی ناوچە داگیرکراوەکان، شکستیان بە رێکخراوەکە هێناوە.









باسنيوز