ئەندامێکی ئەنجوومەنی پارێزگای سلێمانی لە فراکسیۆنی یەکێتیی نیشتمانیی کوردستان ئاشکرای کرد، هەڤاڵ ئەبوبەکر کە لە لایەن ئەنجومەنەکەوە هەڵبژێردرا، ناکرێتە پارێزگاری سلێمانی.



ئەمڕۆ شەممە 1\10\2016، هۆشیار ئیسماعیل، ئەندامی ئەنجومەنی پارێزگای سلێمانی لە فراکسیۆنی یەکێتی، ڕاگەیاند: “تائێستا لەلایەن حکوومەتی هەرێمی کوردستان و وەزارەتی ناوخۆوە بە شێوەیەکی فەرمی د. ئاسۆ فەرەیدوون، پارێزگاری سلێمانییە، پێشتر مانگێک بۆ ئاسۆ فەرەیدوون درێژ کراوەتەوە، بەڵام ئەمڕۆ وەکالەتی ئەویش تەواو دەبێت، ئیتر ئێمە نازانین چۆن تازە دەکرێتەوە و چی لێدەکرێت؟ ئاگادارنین”.



ئەو ئەندامەی فراکسیۆنی یەکێتی لە ئەنجومەنی پارێزگای سلێمانی، ئەوەشی ئاشکرا کرد کە هەڤاڵ ئەبوبەکر، یەکلابووەتەوە و “تەواو نابێت بە پارێزگار، تەنانەت نووسراو بۆ بەپارێزگاربوونی هەڤاڵ ئەبوبەکر بەرزنەکراوەتەوە، تا ببێت بە پارێزگار".

هۆشیار ئیسماعیل ڕاشیگەیاند کە ئێستا بە فەرمی، سەردار قادر، بەوەکالەت پارێزگاری سلێمانییە، گوتیشی: “لە هەولێر دان بە سەردار قادر دەنێن یان نا، ئەوە نازانین، لە ئاستی حزبیش وەک ڕێککەوتنی گۆڕان و یەکێتی، هەر ئەو بە وەکالەت داندراوە، بۆیە دەبێت وەزارەتی ناوخۆ خۆی ئەو گرفتە چارەسەر بکات".










باسنيوز