سەرۆکی لێژنەی پیشەسازی و وزە لە پەرلەمانی کوردستان ئاشکرای کرد، بەڵگەکان سەلماندوویانە کە لە ناوچەی سەوز نەوتی کەرکووک فرۆشراوە.

ماڵپەڕی (عەرەبی ئەلجدید) لە زاری شێرکۆ جەودەت، پەرلەمانتاری فراکسیۆنی یەکگرتوو لە پەرلەمانی کوردستان کە هاوکات سەرۆکی لێژنەی پیشەسازی و وزەی پەرلەمانی کوردستانە، بڵاوی کردووەتەوە: “بەڵگە و داتاکان سەلماندوویانە کە یەکێک لە گرووپەکانی ناوچەی سەوز، نەوتی کەرکووکی فرۆشتووە، بەڵگەکان ڕادەستی داواکاری گشتی کراون، تاوەکوو لێکۆڵینەوەیان لەسەر بکات و دواتریش بە بڕیاری دادگا، تێوەگلاوانی دۆسیەکە سزا بدرێن”.

شێرکۆ جەودەت ئەوەشی ئاشکرا کردووە کە بەشێک لە نەوتی پارێزگای کەرکووک، لە ڕێگای پارێزگای سلێمانییەوە بەبێ ئاگاداریی حکوومەتی هەرێمی کوردستان و خودی پارێزگاری سلێمانی، “بۆ ئێران نێردراوە”. دووپاتیشی کردووەتەوە: “بەڵگەکانمان ڕادەستی داواکاری گشتی کرد”.

بەپێی قسەی سەرۆکی لێژنەکەی پەرلەمان کە لەو ماڵپەڕە عەرەبییەدا بڵاو کراوەتەوە، ڕۆژانە 3 ملیۆن دۆلار، داهاتی ئەو نەوتە “بەقاچاخبراوە”ی کەرکووکە، بەڵام: “بەقاچاخبردنەکە بە ڕەزامەندی کۆمپانیای نەوتی باکووری سەر بە حکوومەتی عێراق بووە”. باسیشی لەوە کردووە کە ڕێژەیەک لە نەوتی کەرکووک، بۆ پاڵاوگەکانی نەوت لە شاری دووکان گواستراونەتەوە، داهاتی نەوتە بەقاچاخبراوەکە و ئەوەشی دەچێتە دووکان، بۆ گرووپێکی ناوچەی سەوز دەبێت.

پێشتر ئەوە ئاشکرا ببوو کە ئەو نەوتەی لە کەرکووکەوە بۆ هەندێک لە پاڵاوگەکانی دووکان دەڕوات لە لایەک و ئەو نەوتەشی بە تانکەر بۆ ئێران دەگوازرێتەوە، داهاتەکەی بۆ هێرۆ ئیبراهیم ئەحمەد، ئەندامی مەکتەبی سیاسیی یەکێتی و هاوسەری جەلال تاڵەبانی، سکرتێری گشتیی یەکێتییە.










باسنیوز