فراكسیۆنی پارتی دیموكراتی كوردستان پێوەست بە گیانلەدەستانی (بارزان مەحموود)، گەنجە کوژراوەکەی شاری کەرکووک وێڕای ئیدانەکردنی ئەو دەستە ڕەشەی کە وای لەو گەنجە کردووە، هاوکات داوای سزادانی تاوانبارانی ئەو کەیسەیش دەکات.

دەقی ڕاگەیێندراوەکە:

هاونیشتمانیانی بەشەرەف و مرۆڤدۆستی کوردستان

تاوانی "ئەشکەنجەدان تا گیان لەدەستدان"، دەرهەق بە لاوە كوردێکی دانیشتووی شاری كەركووك، بە ناوی (بارزان مەحموود)، لەو چەند ڕۆژەدا هەموومانی تاساند و ویژدانی هەموو مرۆڤدۆستێكی هەژاند.

ئەم تاوانە ڕێک پێشلێكردنی ڕێسا و پرەنسیپە نێودەوڵەتییەكانی مافی مرۆڤ و یاسا ناوخۆیی و دەقە پیرۆزە ئاسمانییەكان و دابونەریتی پێكەوەژیانە، كە بووەتە سیمبولێك بۆ ناسینەوەی شاری بابەگوگوڕ و كەركووكی دڵی كوردستان.
هەموو لایەک خەمێکی قووڵ دایگرتوونە، ئاخر بە گوێرەی لێكۆڵینەوە سەرەتاییەكان ئەو كردەوە دڕندانە ترسنۆکانە، ڕێكخراو بووە.
ئێمە خەمبار و بەپەژارەینە و، پرسە و سەرەخۆشی خۆمان ئاراستەی بنەماڵەی كاكە (بارزان) دەكەین؛ زۆر توندیش ئەو دەستە ڕەشە مرۆڤکوژە مەحکووم دەکەین، كە بەو پەڕی بێویژدانی و دڕندەییەوە، بێبەزەییانە تاوانێکی ئاوەهای کردووە.

داوا لە لایەنە پەیوەندیدارە یاساییەکانیش دەکەین، بە گوێرەی ئەرکی یاسایی خۆیان، بە پێی یاسا، تاوانباران بدەنە دەست دادگا و، بە لێکۆڵینەوەیەکی بەرپرسانەی دوور لە دەستێوەردانی ئەم و ئەو، هەقی ئەو نەهامەتییە بدەن و، بۆ ڕای گشتی بیخەنە ڕوو. لە پەروەردگاریش دەخوازین سەبوری بخاتە دڵی بنەماڵە و کەسوکار و هاوڕێیانیەوە.


فراکسیۆنی پارتی دیموکراتی کوردستان لە پەرلەمانی کوردستان

2016/07/24