لە بەرسڤی ئەو وتارە نادروستانەی لە هەندێك میدیادا بڵاوکراوەتەوە سەبارەت بە ڕاپۆرتێكی ویکیلییکس، "نوێنەرایەتی حکومەتی هەرێمی کوردستان لە ويلايەتە يەکگرتووەكانی ئەمريكا" بە پێویستی دەزانێت ئەم ڕاگەیاندنە رۆژنامەگەرییە ڕابگەیەنێت:

ئەو ئیمەیڵەی لەم دواییەدا دزەی پێکراوە و پەیوەستە بە ئاكپارتی توركییەوە ئەوە دەردەخات کە گەورە بەرپرسێكی ئاكپارتی "هەواڵنامەی مانگانە" و ئاگادارینامەی بۆنەکانی "نوێنەرایەتی حکومەتی هەرێمی کوردستان لە ئەمريكا"ی پێدەگات.
ئەم بەڕێزە و نزیکەی 10,000 بەڕێزی تر لە بەرپرسان و ئەکادیمی و دۆست لە سەرتاسەری جیهاندا ئەم هەواڵنامە و ئاگادارینامانەی ئێمەیان پێدەگات.
ئەو ئیمەیڵ ئەدرێسەش بریتییە لە ئیمەیڵێکی گشتیی "نوێنەرایەتیی حکومەتی هەرێمی کوردستان لە ئەمريكا" و لەبەردەستە لەسەر لاپەڕەی سەرەكیی ماڵپەڕەکانی "حکومەتی هەرێمی کوردستان" و "نوێنەرایەتی حکومەتی هەرێمی کوردستان لە ويلایەتە یەكگرتووەكانی ئەمريكا".

پەیام و ئەركی "نوێنەرایەتی حکومەتی هەرێمی کوردستان لە ويلايەتە یەكگرتووەكانی ئەمريكا" بریتییە لە بەرەوپێشبردن و گەشەپێدانی بەرژەوەندییەكانی گەلی کوردستان. ئاماژەی ئەوەی کە بگوترێت ئەو ئیمەیڵانە نەگونجاون لەگەڵ ئەو پەیام و ئەرکانەدا، بریتییە لە ناڕاستگۆیی و ناوزڕاندنێكی بەئەنقەست.