سەرۆكی هەرێمی كوردستان پێشوازی لە باڵیۆزی بریتانیا لە عێراق دەكات
لە دیدارەكەدا باس لە دوا هەڕەشە و پەرەسەندنەكانی كردەوەی تیرۆریستی و هزری توندڕۆیی لەسەر ئاستی جیهان و ناوچەكە كرا، هەروەها ڕۆشناییش خرایە سەر سەركەوتنە سەربازییەكانی بەرانبەر داعشلە ناوچە جیاجیاكانی عێراق.
ئامادەكارییەكان ئۆپڕاسیۆنی ئازادكردنی موسڵ تەوەرێكی دیكەی دیدارەكە بوو و هەردوولا جەختیان لەوە كردەوە كە لەپێناو ڕێگەگرتن لە دروستبوونی كێشەی قووڵتر و پاراستنی پێكهاتە ئایینی و نەتەوەییەكان و دڵنیاییان و دووبارەنەبوونەوەی كارەساتەكان، پێویستە بەر لە ئازادكردنی موسڵ ڕێككەوتنێكی سیاسیی لەنێوان لایەنەكاندا هەبێت و باڵیۆزی بریتانیا سەرۆك بارزانیی لە بۆچوونی وڵاتەكەی پەیوەست بەم باسە ئاگادار كردەوە. هەروەها كورتەیەكیشی لەبارەی بڕیاری گەلی بریتانیا بۆ دەرچوون لە یەكێتی ئەوڕوپا و كاریگەریی ئەو بڕیارە لەسەر سیاسەتی دەرەكیی بریتانیا خستەڕوو.
لە بەشێكی دیكەی ئەم دیدارەدا بیروڕا لەبارەی پڕۆسەی سیاسیی عێراق و ئاییندەی پەیوەندییەكانی هەرێمی كوردستان و عێراق ئاڵوگۆڕ كرا.
جێگەی ئاماژەپێكردنە لەم دیدارەدا ئەنگوس مەكی كونسوڵی گشتیی بریتانیا كە كۆتایی بە ئەرك و كارەكانی هاتووە سوپاسی سەرۆك بارزانی و حكوومەتی هەرێمی كوردستانی كرد كە لەماوەی كاركردنیدا هەماهەنگ و هاوكاری بوونە و هیوای سەركەوتن و بەختەوەری بۆ گەلی كوردستان خواست و لەبەرانبەردا سەرۆك بارزانی هیوای سەركەوتنی بۆ خواست لە ئەرك و كاری تازەكەیدا.
