لەھۆڵی بۆنەکانی شاری پێنجوێن، مەراسیمی یادی 36 ساڵەی یەکەمین راپەڕینی پێنجوێنییەکان دژ بەدەسەڵاتی رژێمی پێشووی بەعس بەڕێوەچوو، قایمقامی پێنجوێنیش داواکارییەکانی شارەکە دەخاتەڕوو.

زانا رەحمان، قایمقامی پێنجوێن رایگەیاند، کە شارەکە کۆمەڵێک پێداویستی پێویستە و داوای لە حکوومەتی هەرێمی کوردستان کرد، بە دەنگ داکارییەکانییانەوە بچن.

هەروەک زانا رەحمان رایگەیاند، پێنجوێن پویستیی بە کردنەوەی بەڕێوەبەرایەتییەکی رێگاوبانە، جگە لەوەش پیویستە رووبەری شارەکە و دەوروبەری لە مین پاک بکرێتەوە، کە بە گوتەی ئەو، ”53 ملیۆن مین“ لەو ناوچەیە ماون.

قایمقامی پێنجوێ ئاماژەی بەوەش کرد، کە کارەبای نیشتیمانیی ببرێت بۆ گوندەکانی سنوورەکە، ” 20 گوندی سنوورەکەمان تاوەکو ئێستا کارەبای نیشتیمانیان نییە“ و داوای تەواوکردنی رێگای ستراتیژیی پێنجوێن- سەیدسادقیشی کرد.

زانا رەحمان پێیوایە ئەگەر %10ـی داهاتی مەرزی نێودەوڵەتیی باشماخ بۆ سنوورەکە خەرج بکرێ، ئەوا پڕۆژە خزمەتگوزارییەکانی سنوورەکە دەبووژێنەوە.









باسنیوز