ماریانا یوسف خانمه‌ هونه‌رمه‌نده‌كا مه‌سیحیه‌ د ژیێ 20 سالیێدا، ل پارێزگه‌ها دهۆكێ دژین و نها بۆ هنده‌ك كارێن فه‌ر ماوێ دوو سالانه‌ ل باژێرێ ئه‌نقه‌ره‌ یێ توركیا دژیت، پشكدارى د چه‌ندین فلم و شانۆیێن دهۆكێدا كریه‌ و سترانبێژه‌ژى و چه‌ندین ستران هه‌نه‌ و نها خۆ به‌رهه‌ڤ دكه‌ت بۆ چێكرنا دوو كلیپێن نوو.

ماریانا د دیداره‌كا تایبه‌تدا ل گه‌ل (باس) دیار كر، من دهۆك ب جه‌ه نه‌هێلایه‌ و گه‌له‌ك حه‌ز ژ دهۆكێ دكه‌م، به‌لێ ژ بۆ چه‌ند كارێن فه‌ر نها چوویمه‌ ئه‌نقه‌ره‌، هه‌تا نها ئه‌ز یا شووكرى نینم و من ب چ ره‌نگان باوه‌رى ب هندێ نینه‌ ئه‌ڤینیێ ل گه‌ل گه‌نجه‌كى بكه‌م، چونكو نها ل ڤى سه‌رده‌مى ئه‌ڤینیا ژدل نینه‌، ئه‌ز تووشى ئه‌ڤینیه‌كا ژدل بوویمه‌ ل گه‌ل گه‌نجه‌كى، به‌لێ تێدا ب سه‌رنه‌كه‌فتم و كه‌سا خوساره‌ت د وێ پرۆسێدا ئه‌ز بووم و ئه‌ڤ به‌رى پێنچ سالان بوو و من ئێدى حه‌زژێكرن نه‌ڤێت، ب تنێ من حه‌زژێكرنا جه‌ماوه‌رێ خۆ دڤێت.

سه‌باره‌ت كارێ خۆ یێ هونه‌رى ماریا ئاشكرا كر كو وێ د ژیێ 13 سالیێ دا ده‌ست ب هونه‌رى كریه‌، به‌رى نها وێ پشكدارى د چه‌ندین فلم و شانۆیان دا كریه‌، هنده‌ك ژ وان ژى فلمێن كۆمێدى بووینه‌ ل گه‌ل هونه‌رمه‌ندێن كۆمێدى (جه‌لو و خه‌لو) و فلمه‌كێ ده‌رهێنه‌ر (جوان بامه‌رنى) و نهاژى زنجیره‌كا وێ ل سه‌ر شاشا دهۆك تی ڤى دهێته‌ دابه‌زاندن.

ماریانا ئاماژه‌ دا وێ چه‌ندێ، ئه‌و كارێن هونه‌رى یێن وێ كرین نه‌ ل دووڤ خواستا وێنه‌، چونكو وێ پتر هیڤى و ئۆمێد هه‌نه‌، به‌لێ ئه‌و چاڤه‌رێ ئابووره‌كێ باشتر دكه‌ت بۆ هندێ كارێن هونه‌رى یێن باشتر بكه‌ت، به‌لێ پشته‌ڤانێن وێ دكێمن و گۆتیشى: نها من دوو ستران دروست كرینه‌، به‌لێ من چاڤ ل هندێ یه‌ بكه‌مه‌ كلیپ و ژ نوو به‌لاڤ بكه‌م، چونكو ئه‌ڤه‌ ژ نوو دوو ساله‌ من ده‌ست ب سترانگۆتنێ كریه‌.

ل دور خواندنا خۆ دیار كر كو وێ هه‌تا پۆلا پێنجى زانستى خواندیه‌ و پشتى دوو هه‌یڤێن دى دێ ڤه‌گه‌ریته‌ دهۆكێ و وێ ئنیه‌ته‌ جاره‌كا دى ده‌ست ب خواندنا خۆ بكه‌ته‌ڤه‌.