جیهان بە گشتی و رۆژهەڵاتی ناوەڕاست بە تایبەتی بە تەنگەژەیەكی گەورەی ناتەبایی و ململانێی ئاینەكاندا تێدەپەڕێت كە گەیشتۆتە ئەو ئاستەی گروپە تیرۆریستیەكان و دەستە و تاخمە یاخیبووەكانی ناو كۆمەڵگای مرۆڤایەتی بە ناوی ئاینەوە قێزەوەنترین مێژوو بۆ مرۆڤایەتی بنووسنەوە كە هەمیشە مەرجەعی هەموو ئاینەكان ئەو كەسانە لەخۆیان بە دوور دەگرن و خۆیان لێ بێ بەری دەكەن، تیرۆر بە ناوی ئاینەوە وا خەریكە دەبێتە مۆدێلێكی سیستەمی حوكمڕانی كە بە هۆیەوە رۆژانە 15000 كەس لە شوێن و زێدی خۆی ئاوارە دەبێت و رۆژانە لە سەرتاسەری جیهان بە ناوی ئاینەوە زیاتر لە 350 مرۆڤ دەكوژرێت و 160 ئافرەت دەستدرێژی دەكرێتە سەر و لە هەر كاتژمێرێك 22000 كەس بێ ئیش دەبن و لە هەر رۆژێكیش 160000 كەس دووچاری گرتن و راوەدونان و رفاندن و هەڕەشە و تۆقاندن دەبنەوە.
خەریكە ئاین دەكرێتە ئامرازێكی زۆر نامرۆیی و قێزەوەن كە لە كاتێكدا هەموو ئاینەكان داوای پاراستنی نرخ و بەها مرۆییەكان و ئاشتی كۆمەڵایەتی و پاراستنی مافی مرۆڤ دەكەن، لەسەر ئەو بنەمایە ئێمە وەك نوێنەرایەتی كوردانی جوو لە هەرێمی كوردستان داوای دیالۆگی نێوان ئاینەكان دەكەین لە سەرجەم عێراق كە عێراق ئەمڕۆ پشكی شێری ئەو ململانێ ئەتنی و ئاینیەی بەر دەكەوێت، داواكارین لە مەرجەعی سەرجەم ئاینەكان كە یەكدەنگ بن لەگەڵمان تا لە مەڵبەندی پێكەوە ژیانی ئاینی لە شاری هەولێر ئامادەسازی بۆ ئەو پرسە مرۆییە بكەین كە ئایا ئاینەكان هۆكاری ئەو هەموو نەهامەتیەن یان ئەو كارەسات و نەهامەتیانە كەسانێك یان وڵاتانێك بەناوی ئاینەوە بەڕێوەی دەبەن.
بانگ لە ئاینەكان و پێكهاتەكان دەكەین مرۆڤایەتی و ئاینەكان لە لەناوچوون رزگار بكەن، كوشتنی مرۆڤ لە دروستكردنی كەنیشتە و كڵێسا و مزگەوت و ئاورگا و هەر پەرستگایەكی تر گرنگترە، لەپێناو ئاین و باوەڕە پیرۆزەكانتان، لە پێناو ئەوەی كە چیدی مرۆڤ بەناوی ئاینەوە نەكوژرێت، لەپێناو هەرەس پێهێنانی ئایدیۆلۆژیای نامرۆییی گروپە تیرۆریستیەكان با هەموومان دەست لەناو دەست بۆ دیالۆگی ئاینەكان.
نوێنەرایەتی كوردانی جوو
لە وەزارەتی ئەوقاف و كارووباری ئایینی
18ی تەمووزی 2016