بەرپرسی فەرمانگەی پەیوەندییەکانی دەرەوەی حکوومەتی هەرێمی کوردستان رایدەگەیەنێت، کە بە نیگەرانییەوە چاودێریی رووداوەکانی تورکیا دەکەن.

فەلاح مستەفا، بەرپرسی فەرمانگەی پەیوەندییەکانی دەرەوە لە تویتێکدا لە لاپەڕەی فەرمیی خۆی لە تۆی کۆمەڵایەتیی تویتەر هیوای خواستووە ژیری و دیموکراسی سەرکەوتوو بن لە تورکیا.

فەلاح مستەفا هەروەها رایگەیاندووە، کە وەک دراوسێیەکی تورکیا، حکوومەتی هەرێمی کوردستان ”لە نزیکەوە و بە نیگەرانییەوە“ لە رووداو و پێشهاتەکانی ئەم دواییەی تورکیا دەڕوانێت.

شەوی هەینی 15ـی تەمموزی 2016، بەشێک لە سەرکردەکانی سوپای تورکیا هەوڵیان دا کودەتایەکی سەربازیی بکەن و کۆتایی بە دەسەڵاتی رەجەب تەییب ئەردۆغان، سەرۆک کۆماری تورکیا و پارتی داد و گەشەپێدانی تورکیا (ئاکەپە) بهێنن، بەڵام کودەتایەکە شکستی هێنا.










باسنيوز