ڕاوێژکاری ئەنجومەنی ئاسایشی هەرێمی کوردستان، هاوخەمیی خۆی بۆ خەڵکی فەڕەنسا و کەسوکاری قوربانییانی هێرشەکەی باشووری فەڕەنسا دەربڕی.

شەوی ڕابردوو لە شاری (نیس)ی باشووری فەڕەنسا، لە میانی ئاهەنگی جەژنی نیشتمانیی فەڕەنسا کە بە (ڕۆژی باستیل) ناسراوە، بارهەڵگرێک خۆی کرد بەناو ئاهەنگ گێڕانی شارەکە و لانی کەم، 80 کەس کوژران و سەدانی دیکە بریندار بوون.

ئەمڕۆ هەینی 15\7\2016، مەسرور بارزانی، ڕاوێژکاری ئەنجومەنی ئاسایشی هەرێمی کوردستان، لە پەیامێکی کورتدا کە لە پێگەی فەرمیی خۆی لە تۆڕی کۆمەڵایەتیی (تویتەر) بڵاوی کردووەتەوە، نووسیویەتی:”هاوسۆزیم بۆ خەڵکی فەڕەنسا لە بارەی هێرشەکەی شاری نیس”. جەختیشی لەوە کردووەتەوە کە لە شەڕی دژی تیرۆردا “لەگەڵتان دەبین”.

پاش تەقینەوەکە، فرانسوا هۆلاند، سه‌رۆكى فه‌ڕه‌نسا، ڕای گەیاند: "منداڵ و ئافره‌ت له‌نێو قوربانییه‌كانى ئه‌و هێرشه‌دان، بۆیە ناكرێت نكۆڵى له‌وه‌ بكرێت کە هێرشه‌كه‌، هێرشێكى تیرۆریستییه‌”.

هێرشه‌كه‌ له‌ شەقامی "بروومیناد دی ئه‌نگلى"ى ناسراو له‌ شارى نیس و له‌كاتى ته‌قاندنى یاریی ئاگریندا، ئه‌نجام دراوە. به‌پێی لێدوانى داواكارى گشتى: "شۆفێری بارهه‌ڵگره‌كه‌، هێرشەکەی لە ڕێگای تەقاندنەوە ئەنجام نەداوە، بەڵکو بە خێراییەکی زۆر، مەودای 2 کیلۆمەتری بڕیوە، تا ئەو کاتەی پۆلیس توانیویەتی بیکوژێت”.

له‌ناو بارهه‌ڵگركه‌شدا چه‌ك و ته‌قه‌مه‌نى دۆزراوه‌ته‌وه‌، هه‌روه‌ها به‌پێی زانیارییه‌ بڵاوكراوه‌كان، پۆلیس به‌ڵگه‌ى له‌ناو ئۆتۆمبیله‌كه‌دا ده‌ستكه‌وتووه‌، كه‌ شۆفێره‌كه‌ فه‌ڕه‌نسییه‌ و له‌ بنه‌ڕه‌تدا خه‌ڵكى وڵاتى تونسه‌.

به‌پێی زانیارییه‌كان، تائێستا نزیكه‌ى 80 كه‌س له‌و هێرشه‌دا گیانیان له‌ده‌ست داوه‌ و به‌ ده‌یانى دیكه‌ بریندارن كه‌ بارى ته‌ندروستى 18ـه‌یان، زۆر ناجێگیره‌.