ڕاوێژکاری ڕاگەیاندنی سەرۆکایەتیی هەرێمی کوردستان ئاشکرای کرد، بەهۆی لێکتێگەیشتنەکەی ئەمڕۆ سێشەممە 12\7\2016ی نێوان وەزارەتی پێشمەرگەی هەرێمی کوردستان و وەزارەتی بەرگریی ئەمریکا، چیتر واشنتۆن لە ڕێگای بەغداوە هاوکاریی پێشمەرگە و هەرێمی کوردستان ناکات.

کیفاح مەحموود، ڕاوێژکاری ڕاگەیاندنی سەرۆکی هەرێمی کوردستان، لە لێدوانێکیدا ڕایگەیاند، واژووکردنی لێکتێگەیشتنەکەی ئەمڕۆی نێوان وەزارەتی بەرگریی ئەمریکا و وەزارەتی پێشمەرگە، جەخت لەو سەرکەوتنە گەورەیە دەکاتەوە کە بارزانی و پێشمەرگە لە دژی داعشدا تۆماریان کردووە. ڕوونیشی کردەوە: ”پێشمەرگە سەلماندوویەتی کە هێزێکی سەربازیی ڕێکوپێکە و لە ناوچەکانی ململانێدا ڕێز لە مافەکانی مرۆڤ و یاساکانی شەڕ و یاسا نێودەوڵەتییەکان دەگرێت، جگە لەوەی لە ماوەی ئەو 2 ساڵەدا پێشمەرگە بە سەرکردایەتیی بارزانی، سەرکەوتنی گەورەی لە دژی داعش بەدەست هێناوە و هەماهەنگییەکی وردیشی لەگەڵ لایەنی نێودەوڵەتی و لایەنی عێراقیشدا هەبووە، ئەمەش وای لێ کراوە کە لە هەموو جیهاندا ڕێزی لێ بگیرێت“.

کیفاح مەحموود ئاماژەشی بەوە کرد: ”ئێمە هەست بە گرنگیی ئەو لێکتێگەیشتنەی نێوان وەزارەتی بەرگریی ئەمریکا و وەزارەتی پێشمەرگە دەکەین، کە پشتیوانیی پێشمەرگە دەکات لە ڕووی دارایی و سەربازی و مەعنەوییەوە“. گوتیشی: ”لەمەودوا ئەمریکا بەبێ گەڕانەوە بۆ بەغدا، هاوکارییەکانی بە هەرێمی کوردستان دەگەیەنێت، بەڵام بە هەماهەنگیی بەغدا دەبێت“.

ڕاوێژکاری ڕاگەیاندنی سەرۆکی هەرێمی کوردستان ئەوەشی ئاشکرا کرد: ”بە دڵنیاییەوە لێکتێگەیشتنی دوورمەودا لە نێوان ئاسایش و ئاشتیی ناوچەکە هەیە لە نێوان هەولێر و واشنتۆن، بەبێ هەماهەنگیکردن لەگەڵ پێشمەرگە، ناکرێت ئاسایش و ئاشتیی ناوچەکە بەرقەرار بێت“.
رۆژی سێشەممە 12\7\2016، بە سەرپەرشتیی مەسعود بارزانی، سەرۆکی هەرێمی کوردستان، لێکتێگەیشتنێک لە نێوان بۆب وۆرک، یاریدەدەری وەزیری بەرگریی ئەمریکا بۆ کاروباری ئاسایشی نێودەوڵەتی و کەریم سنجاری، وەزیری پێشمەرگەی حکوومەتی هەرێمی کوردستان بە وەکالەت واژوو کرا.




باسنیوز