رۆژی ٢٠ی تشرینی یەکەمی ٢٠١٥ شاندێکی کۆمەڵی ئیسلامی لەگەڵ سکرتێری مەکتەبی سیاسی پارتی کۆبوونەتەوە، بەرپرسی نووسینگەی ئەمیری کۆمەڵیش دەڵێ: "بە نوێژی نیوەڕۆ سەردانی مەکتەبی سیاسی پارتیمان کردووە".

حەسەن بابەکر، بەپرسی مەکتەبی ئەمیری کۆمەڵی ئیسلامی کوردستان راگەیاند: لە چەند رۆژی رابردوودا من و کاک محەممەد حەکیم، کارگێری ئەنجوومەنی سیاسی بە بیری حیزب سەردانی کاک فازڵ میرانی، سکرتێری مەکتەبی سیاسی پارتیمان لە سەر باردۆخی سیاسی ئێستای ھەرێمی کوردستان و ھێورکردنەوەی باردۆخەکە کرد، بۆچوونەکانی ھەردوولامان ئیجابی بوونە".

حەسەن بابەکر گوتی: ئێمە بە دزییەوە سەردانی مەکتەبی سیاسی پارتیمان نەکردووە، بەڵکو بە رۆژی رووناک چووینە، بەڵام لە ئەوەی ئێمە کەناڵی ئاسمانیمان نەماوە، برادەرانی پارتیش سەردانەکەیان نەدایە راگەیاندنی خۆیان، بۆیە خەڵک لێرە و لەوێ قسەی ناڕاستیان لەسەر ئەم سەردانە کرد، بۆیە ئەوەی لە بارەی ئەم سەردانەی کۆمەڵ بۆ لای برایانی پارتی بڵاوکرایەوە ھیچ بنەمایەکی نییە و دوورە لە راستی کۆمەڵی ئیسلامیش لە پێگەی بەھێزی سیاسیی خۆیەوە مامەڵە لەگەڵ بەرگریکردن لە یاساو شەرعییەت دەکات".

بەرپرسی نووسینگەی ئەمیری کۆمەڵی ئیسلامی بۆچوونی فازڵ میرانی بە ئیجابی وەسف دەکات و دەڵێ:"قسەکانی کاک فازڵ زۆر بەرپرسیارانەتر بوو لە چاو قسەی ھەندێک سەرکردەی دیکەی پارتی".

سەبارەت بە رێگریکردن لە گەڕانەوەی فەخرەدین قادر، سکرتێری پەرلەمانی کوردستان بۆ ھەولێر و وەرگرتنەوەی ئەو پۆستە لە کۆمەڵ، حەسەن بابەکر گوتی:" ئەوانەی لە سەر ئەو بابەتە دەگوترێت راست نییەو باسی ئەو بابەتەمان نەکردووە".





رووداو