لەسەر پێشنیازی د.یوسف گۆران وەزیری خوێندنی باڵاو توێژینەوەی زانستی حكومەتی هەرێمی كوردستان و، بەمەبەستی باشتركردنی بەرنامەی خوێندن لە بەشەكانی زمانی ئینگلیزی و پەرەپێدانی توانستی ئەنجامدانی توێژینەوەو بەرزكردنەوەی ئاستی زانستی مامۆستایان لە بەشەكانی زمانی ئینگلیزی، باڵیۆزخانەی ئەمریكا لەعیراق لەرێگەی رێكخراوی ئایرێكس (IREX) بۆ ماوەی یەك ساڵ خولی راهێنان بۆ مامۆستایانی بەشی زمانی ئینگلیزی لە زانكۆكانی هەرێمی كوردستان دەكاتەوە.



وەزارەتی خوێندنی باڵا لە ڕاگەیەنراوێک کە وێنەیەکی بە ئاژانسی هەواڵی پەیامنێر گەیشتووە ڕایدەگەیەنێت، لەپێناو دروستكردنی پەیوەندی زانستی و ئەكادیمی لەنێوان زانكۆكانی هەرێمی كوردستان و ئەمریكا، رێكخراوی ئایرێكس (IREX) بە پشتگیری دارایی باڵیۆزخانەی ئەمریكا لە عێراق بۆ یەكەم جار لەسەر ئاستی هەرێمی كوردستان خولێكی راهێنان بۆ (22 ) مامۆستا لە بەش و سەنتەرە جیاكانی زمانی ئینگلیزی لە سەرجەم زانكۆكانی هەرێمی كوردستان دەكاتەوە.



خولەكە لە سەرەتای ساڵی داهاتوو دەستپێدەكات و لە کۆتایی خولەکە دە مامۆستای راهێنراو بۆ بەشداری لە خولێكی تری راهێنان كە لە ماوەی مانگەكانی شوبات - حوزەیرانی ساڵی داهاتوو لە ئەمریكا بەڕێوەدەچێت هەڵدەبژێردرێن.



دوای تەواوكردنی خولەكە هەر بەشداربوویەك پاش گەڕانەوەیان بۆ هەرێمی كوردستان، بە ئامانجی پەرەپێدان و تێگەیشتنی هاوبەش و شارەزایی كلتوری نێوان هەرێمی كوردستان و ئەمریكا، خول و راهێنان لە پێناو باشتركردنی بەرنامەی خوێندن لە بەش و سەنتەرەكانی زمانی ئینگلیزی لە زانكۆكانی هەرێمی كوردستان پێشكەش دەكەن.