روونکردنەوەیەک لە برازای میر تەحسین بەگەوە
لە روونكردنەوەكەدا نووسراوە كە ئەوان دڵنیان ئەو لێدوانەی میرەكەیان لەژێر گوشاری هەندێك رۆشنبیر و لایەنی سیاسی لە ئەڵمانیا هاتووە و هەروەها هەر لە روونكردنەوەكەدا ئاماژە بەوە دراوە كە باری تەندروستی میر تەحسین بەگ جێگیر نییە، بۆیە توانراوە كاریگەری لەسەر دروستبكرێت و بتوانێت بڵێت ئێزدی كورد نین و ئاماژەش بەوە دراوە كە وەك گەنجانی بنەماڵەی میرانی ئێزدی پشتگیری لەو گرووپە ناكەن، كە وایان لە میر كردووە ئەو لێدوانە بدات.
لە كۆتایی روونكردنەوەكەدا هاتووە "نامانەوێت مێژوومان بشێوێنرێت ، چونكە هەموو دونیا شاهیدە لەسەر كوردبوونی ئێزدیەكان و هەموو شوێنە پیرۆزەكانی ئایینی ئێزدی لە كوردستانن و ئێزدییەكان بەدەیان شەهیدیان داوە لەپێناو كوردستان".
دەقی روونكردنەوەكە:
راگەهاندنەك ژ بنەمالا میرێن ئیزدیان
ئەم كۆمەكا گەنجین بنەمالا میرێن ئێزدیان ل عیراقی و جیهانی هەلویستێ خوە رووهن وئاشكرا دكەین ل سەر كورداتیا ئێزدیان چونكو پێش چوار هزار سالە ئێزدیان یا سەلماندی ب ئول و كەلتورێ خوە كو ئێزدی كوردن.
ئەم دبینن گوتارا میری ئیزدیان یا كەنالێ عەرەبیە هاتیە پەخشكرن ل ژێر فشارا هندەك رەوشەنبێرین لایەنێن سیاسی یە ل ئەلمانیا هەمان هزرین قرێژی رژێما گۆر ب گۆر یا ژناڤچوویی نە كو چەندین جاران هەولدان كرینە ناسنامەیا ئێزدیان ب گوهوریت وبكەتە عەرەب، لێ ئێزدیان هەر كورداتیا خوە پاراستینە چوو كەس ولایەن نەشێن ڤێ چەندی ڤەشێرت ئێزدی دێ هەر مینن كورد وكوردستانی.
بارێ تەندروستیێ میر تەحسین بەگ نە یێ جێگیرە، ئەڤە ژی بوویە ئەگەر كارتێكرن ل میری بهێتەكرن ل وێ چەندێ گوتبوو ئێزدی كورد نینن ئەم بخوە ژی وەكو گەنجێن بنەمالە میرێن ئێزدیان نە دگەل وێ گروپێ نە یێن پیشتەڤانیێ ل جەنابێ میری كرین، چونكو زێدەتر ژ 70 فرمانان ژبەر كوردینا ئێزدیان ب سەر ئێزدیان هاتینە وفرمانا ڤێ دووماهیێ ژی یا شنگال ژبەر هندێ بوویە كو ئێزدی كوردن.
مە نەڤێت بەرپەرێن میژوویی تێكڤەدەن چونكو هەموو دونیا شاهد كوردینا ئێزدیانە و ئیزدیان هزارەها شەهید وقوربانیێ پێخەمەت پاراستنا ئاخا خوە پیروز ل كوردستانی داینە هەموو جهێن پیروزێن ئێزدیان ل كوردستانێ نە، ئێزدی كەڤنترین دینێ دەڤەریێە دێرۆك شاهدە ل سەر ڤێ چەندی.َ
ئەم دووپات دكەین كو كوردێن ئێزدی دبن دادپەروەریا بارزانی دا دێ هەموو مافێن خوە شاد بن و سوپاسیا هەموو خەلكێ خوشتڤیێ هەرێما كوردستانی دكەین ، ب تایبەتی ژی خەلكێ دهۆكا داسنیا بۆ پیشتەڤانیا وان ل ئاوارەیێن كوردێن ئێزدی.
داسن فاروق بەگ
ئێك ژ میرێن ئێزدیان
رووداو
