لە لێدوانێكی تایبەتدا بۆ گۆڤاری گوڵان ئارام شێخ محەمەد جێگری سەرۆكی ئەنجومەنی نوێنەرانی عێراق بۆ گوتى: لە دوای هاتنی هێزە چەكدارەكانی داعش و دەستبەسەراگرتنی هەندێ پارێزگای عێراق لە لایەن ئەو گرووپە تیرۆریستییەوە، بارودۆخەكە بە تەواوەتی نائارام بووە، بەتایبەتی كۆنتڕۆڵكردنی پارێزگایەكی گەورەی وەك موسڵ و تكریت و بەشێكی زۆری ناوچەكانی رومادی و دیالە و هەندێ شوێنی نزیك بە بەغدا، ئەمانە بۆ خۆیان كاریگەری گەورەیان دروست كردووە لە رووی مەیدانی و لەسەر زەمینی واقیع كە ئەمەش دەرهاوێشتەی دۆخێكی سیاسی قەیرانگرتووی ناو عێراق بووە، بەهۆی كێشەی قووڵی حوكمڕانی و نەبوونی شەراكەتێكی راستەقینە لە سیستمی حوكمڕانیدا و شكستی تێكڕای سیستمەكە لە رووی ئابووری و ئەمنی و لەم دواییانەشدا لە رووی سەربازییەوە، هەروەها بە هۆی جێبەجێنەكردنی تەواوی ماددەكانی دەستوور و هەبوونی كێشەیەكی قوڵی درێژخایەن لە نێوان هەرێمی كوردستان و حكومەتی بەغدا، دواتریش بڕینی بەشە بودجەی هەرێمی كوردستانی بەسەردا هات.


هەروەها ئارام شێخ گوتی: لەو بڕوایەدا نیم روانین لە ئومێد شتێك بێت ئێستا یەكلا بێتەوە، ئەوە دەمێنێتەوە بۆ داهاتوو، پێكهێنانی حكومەت مەسەلەیەكە ڕەنگە تا یەك دوو مانگیش بەردەوام بێت و شتێكی ئاساییە، بەڵام سەركەوتنی، یان شكستی دەمێنێتەوە بۆ ئایندە، لە ناوچەكانی تری عێراقیش ئومێدەكە بەو جۆرە نییە كە باسی دەكەن، ئێمە لە نزیكەوە پێوەندیمان لەگەڵ خەڵك هەیە و ئاگادارین، بۆ كوردستانیش بە هەمان شێوەیە، ئەو هەموو كێشە سیاسی و قەیرانە دارایی و ئابووری و سیاسی و ئەمنییانە تەنیا بە راگەیاندنی پێكهێنانی حكومەت كۆتاییان نایەت، بەڵكو لە دوای كەوتنەسەركاری حكومەت ئیشەكانی سەلمێنەری ئەوەن كە دەتوانێت كۆتایی بەم قەیرانانە بهێنێت یان نا، بۆ ئەم مەبەستە خەڵك چاوەڕێیە تا بزانێت ئەم حكومەت دەتوانێت شتێك بكات، یان نا.

شایانی باسە ئارام گوتی: هەرچی هەبووبێت لە رێی لیژنەی گفتوگۆوە باس كراوە، لیژنەی دانوستاندكاری سیاسیی كورد كە بە بڕیاری سەركردایەتی سیاسی لە هەولێرەوە نێردراون و هاتوونەتە بەغدا، ئەوان قسەیان لەگەڵ لایەنە شیعەكان كردووە، نەك ئێمە وەك پەرلەمان، هەر ئاگادارییەكمان وەرگرتبێت لەوانەوە پێمان گەیشتووە، ئاگاداری ئەوەین كە بڕیارە لیژنەیەك دروست بكرێت لە نێوان هەرێمی كوردستان و حكومەتی عێراقیدا بەسەرپەرشتی سەرۆكی حكومەتی هەرێمی كوردستان و سەرۆكی حكومەتی بەغدا، بۆ ئەوەی لە بارەی كێشە هەڵپەسێردراوەكانی نێوان هەردوولا گفتوگۆ بكرێت، بەڵام وەزیرەكانی ئێمە هێشتا دەوامیان نەكردووەو مەسەلەی وەزارەتەكان بە تەواوەتی یەكلایی نەكراونەتەوە، بەشێك لە رێككەوتنەكە دوای مەسەلەی پێكهێنانی حكومەت و دوای بەشداریكردنی ئێمە لە حكومەتدا وەك كورد گفتوگۆكردنە لەسەر چارەسەركردنی ئەو كێشە هەڵپەسێردراوانە، بەتایبەتیش لە ئێستادا مەسەلەی نەوت و بودجەیە.

لە درێژەی دیدارەكەیدا شێخ هەروەها گوتی: لە عێراقدا زۆر دەموچاومان تاقیكردۆتەوە، كێشەی ئێمە شەخسی و دەموچاوەكان نییە، ئەگەرچی ئەمجارە كۆمەڵێك كەسی باشیان تێدایە، تەنانەت دكتۆر حەیدەر عیبادی لە دەستەی سەرۆكایەتی پەرلەمان پێكەوە بووین، وەك پێوەندی شەخسی كێشەیەكمان نییە، بەشێك لە وەزیرەكانیش ئەندام پەرلەمان بوون لەلای ئێمە، رۆژانە مامەڵەی شەخسیمان هەبووە پێكەوە، بەڵام ئەوە گرنگە كە ئەم كەسە باشانە كاتێك دەچێتە ناو ئەو وەزارەتەوە تا چەند پابەند دەبن بەو رێككەوتنانەی لەگەڵ ئێمە واژۆی دەكەن، تەنانەت لەگەڵ لایەنەكانی تریشدا هەروایە، ئەمە لەسەر بنەمای ململانێ بۆ بەرژەوەندی بەجێ دەمێنێت، راستە كەسەكان گرنگن، بەڵام لەوان گرنگتر هەیە كە بریتییە لە بەرنامەی حوكمڕانی و پابەندبوون بە جێبەجێكردنی بڕیار و بەڵێنەكان، كێشەی ئێمە گۆڕینی دەموچاوەكان نییە بە قەدەر ئەوەی كێشەكە لە میتۆدی بەڕێوەبردنی كارەكاندایە.


بۆ خوێندنەوەی ئەم بابەتە لە گۆڤاری گوڵان ژمارە (994)