پارتی: دۆخێكی لەبار بۆ گەلی كورد ڕەخساوە، زیاتر پێویستی بە یەكڕیزی و یەكهەڵوێستی و یەكهەستیی نەتەوەیی و نیشتیمانی هەیە
مەكتەبی سیاسیی پارتیی دیموكراتی كوردستان، لە بەیاننامەکەیدا جارێكی دیكە جەخت دەكاتەوە سەر هاوپەیمانەتی و دۆستایەتی و گیانی بەرپرسیارەتی و گوتاری هاوبەش و هەماهەنگی و هاوكاری لەگەڵ هێز و لایەنە سیاسییەكانی دیكەی كوردستان بۆ پتەوكردنی یەكڕیزی و پتر رێكخستنی نێوماڵی كوردستان و وەلانانی كێشە و گیروگرفتە لابەلاكان بۆ رووبەڕووبوونەوە و چارەكردنی كێشە هەنووكەیییەكان و شەڕی داسەپاوی تیرۆریستان.
دەقی بەیاننامەی مەكتەبی سیاسیی پارتیی دیموكراتی كوردستان بە بۆنەی (53)ـیەمین ساڵیادی هەڵگیرسانی شۆڕشی مەزنی ئەیلوول:
لە بیرەوەریی (53)ـیەمین ساڵیادی هەڵگیرسانی شۆڕشی مەزنی ئەیلوولدا، گەرمترین پیرۆزبایی لە ئەندامان و لایەنگر و دۆستان، لە ئۆرگان و دەزگا و ناوەند و رێكخراوەكان، لە گشت گەلی كوردستان بە تایبەتی هێزە دلێر و خۆڕاگرەكانی پێشمەرگە لە بەرەكانی جەنگ و پێشمەرگە دێرینەكان، دەكەین، سڵاو و رێز بۆ خانەوادە و كەسوكاری سەربەرزی شەهیدان دەنێرین، هیوادارین هەمیشە گەلەكەمان لە ئاسوودەیی و بەختەوەری و سەركەوتندا بێت.
هەڵگیرسانی شۆڕش بە سەركردایەتیی پارتیی دیموكراتی كوردستان و بە ڕابەرایەتیی باوكی رۆحیی (بارزانیی نەمر) لە (11-ی ئەیلوولی1961) وەرچەرخانی قۆناخێكی نوێ و گرنگی سەرتاسەریی پێ بوو لە دیرۆكی بزووتنەوەی رزگاریخوازی كورد و كاروانی نەپساوەی خەبات و تێكۆشاندا، هەروەها پەیامێكی مێژوویی بوو بۆ بەدیهێنانی خواست وئاواتەكانی گەل و نەتەوەكەمان و گەیشتن بە گشت مافە نەتەوەیی و نیشتیمانییەكانی.
شۆڕشی مەزنی ئەیلوول لە سەردەمێكی وا هەستیاردا سەری هەڵدا وەك پێویستییەكی مێژوویی دژ بە زوڵم و ستەم و چەوسانەوە و سەركوتكردن و جوداكاری، شۆڕشێك بوو لە قۆناخێكدا هەڵگیرسا لە رووی چەندایەتی و چۆنایەتییەوە لەگەڵ قۆناخەكانی پێشتری زۆر جیاواز بوو، ساڵەهای ساڵ گەلێك هەوراز و نشێوی دژوار و سەرسەختی بەڕێ كرد هەر لە شەڕ و دانوستان و گوتووێژ و گرژی و ململانێی سیاسی و چەكداری، دڕی بە نائومێدی دا و تەمی شەوەزەنگی زۆرداری و نەهامەتیی رەواندەوە و ترووسكایی ئاسۆیەكی تازەی بەخشییە خواست و ئاواتی لەمێژینەی گەلەكەمان و بزووتنەوە رزگاریخوازەكەی.
هەڤاڵانی خۆشەویست...
شۆڕشی ئەیلوول بە سەركردایەتیی (بارزانیی نەمر) كە سەركردەیەكی مێژوویی خاوەن زیاتر لە نیوسەدە خەبات بوو، وێڕای سەرتاپاگیرییەكەی لە سەرتاسەری كوردستان و پێكهاتوو لە چینوتوێژەكانی كۆمەڵگە و فرە كەمینە نەتەوەیی و ئیتنییەكان لەسەر ئاستی ناوخۆوە لەسەر ئاستی دەرەوە و نێودەوڵەتییش وەك دۆزێكی سیاسی و رەوا دەنگ و سەداو كاریگەری و گرینگیی خۆی هەبوو لەو رووەوە خودی (بارزانیی نەمر) هەمیشە لە هەوڵدا بوو بۆ بەنێودەوڵەتیكردنی كێشەكە و راكێشانی سەرنجی روون و هەڵوێستی كاریگەرانەی وڵاتان.
پەیامە پیرۆزەكەی شۆڕشی ئەیلوول لە نێو جەرگەی كۆمەڵگەی كوردستان و كولتووری شۆڕشگێڕیی كوردایەتی و رەسەنایەتییەوە سەرچاوەی گرتبوو، بۆیە شۆڕشێكی درێژخایەنی راگەیاند و مەشخەڵی خەبات و بەرخودانی هەڵكرد، لەو رێگەیەیشدا و بە درێژایی كاروانی تێكۆشانی بە سەدان و هەزاران شەهید و قوربانیی دا بۆ پاراستنی كیان و هەبوون و شكۆداریی نەتەوەیی گەلی كوردو كوردستانییەكان رووبەڕوبوونەوەی ستەم و زۆرداری رژێمە یەك لەدوای یەكەكانی عێراق.
زنجیرەی خەباتی چەكداری و سیاسی و دیپلۆماسیی ئەو قافڵە سەركەشە لە قۆناخە جیاجیاكانی تێكۆشانیدا ئەو دەسكەوتانەی لەو كاروانە نەپساوە پڕسەروەرییەدا بەدی هاتوون، لەوانەیش (رێككەوتننامەی 11-ی ئاداری 1970) ئۆتۆنۆمی بۆ كوردستان و راپەڕینەكانی 1991 و ئەزموونی حوكمڕانیی هەرێمی كوردستان، گەواهیدەری ئەوەن كە بەرهەمی ئەو كاروانە نەسرەوتووەیە و بووەتە فاكتەری سەرەكیی ئەو سەقامگیرییەی ئەمڕۆ لە عێراق و ناوچەكەدا هەیە، ئەمەیش نیشانەی ئەوەیە، كە ئێمە لە بەردەم ئەزموونی خەباتێكی هەمەلایەنەی دەوڵەمەندین، لە بەردەم هێزێكی پێشەنگ و هەردەم پشتئەستوور بە بیروباوەڕی شۆڕشگێڕی و خەباتی سیاسیی جەماوەریداین، كە بە گیانی كوردایەتی و كوولتووری دیالۆگ و برایەتی و پێكەوەیی لەسەر ئاستی ناوخۆ و پارچەكانی دیكەی كوردستان بەردەوام كاری كردووە بۆ بەدیهاتنی ئامانجە نەتەوەییە رەواكان لەوانەیش كێشەی كەركووك كە تەوەری سەرەكیی خەبات و تێكۆشانی بزووتنەوەی رزگاریخوازی كورد بووە و ئەوسایش دروشمی سەرتاسەریی گەلی كوردستان (كوردستان یان نەمان) بووە.
هەمیشە بەرنامە و ئاڵای شەكاوەی شۆڕشی مەزنی ئەیلوول لە بەرژەوەندیی تەواوی گەلی كوردستاندا بووە بە بێ جیاوازیی ئیتنی و ئایینی و ئایینزا و هەروەك لانەیەكی ئارامئامێزی بۆ تەواوی نیشتیمانپەروەران و سیاسەتمەداران ئاوەڵا بووە، لە هەورازونشێوی خەباتدا سڵی لە خیانەتكاران و پیلانگێڕان و دوژمن و نەیارانی نەكردووەتەوە و بەردەوام خۆڕاگرانە و بەرپرسانە بە بیروباوەڕێكی پتەو و لەبننەهاتووی شۆڕشگێڕانەوە مكوڕ بووە لەسەر جۆشدان و رابوونی سیاسی و ئابووری و كۆمەڵایەتی و كوولتوری و هۆشیاریی، بۆیە شوورەیەكی پۆڵایینی شۆڕشگێری و كوردایەتیی ئەوتۆی بونیاد نا، كە گیانی هەمیشەیی بەرخودان و حەماسەتی وەبەر خەڵكی كوردستان دا بۆ داكۆكیكردن لە كێشەكە و گەیشتن بە ئامانجەكان.
جەماوەری خۆڕاگری كوردستان..
ئەمڕۆ بارودۆخێكی گونجاو و لەبار بۆ گەلی كورد و پێگە سیاسییەكەی رەخساوە بۆ دیاریكردنی چارەنووس و ئاییندەی سیاسی كە زیاتر پێویستی بە یەكڕیزی و یەكهەڵوێستی و یەكهەستیی نەتەوەیی و نیشتیمانی هەیە كە بێگومان زامنی سەركەوتنن، هەروەها لەو قۆناخەدا نەخشەی سیاسیی دەوڵەتی عێراقیش گۆڕاوە و وڵاتانی بڕیاربەدەست و نێوەندە سیاسییە جیهانییەكان و سیاسەتمەدارانی جیهان بە بایەخەوە دەڕواننە هەرێم وەك وڵاتیكی بڕواپێكراو و شەرعی و رۆڵی كورد لە دابینكردنی ئارامی و سەقامگیری لە ناوچەكە و ئەزموونی حوكمڕانیی سەركەوتووانەی هەرێم، لەلایەكی دیكەوە، ئەمڕۆ هاوسەنگیی هێزەكانیش گۆڕاون، بۆیە رووداوەكانی ئەم دواییەی شاری مووسڵ و ناوچەكە واقیعێكی تازەی هێناوەتە ئاراوە و دوابەدوای ئەوەی هێزەكانی پێشمەرگەی كوردستانیش لە بەرەكانی جەنگ بەردەوامن لە سەركەوتنەكانیان و هەمیشەیش لە پێشڕەویدان، بۆیە پێویستە لەمەودوا گەلی كورد بە گشت لایەنە سیاسییەكانییەوە سوود لە ئەزموون و شۆڕشەكانی و مێژووی وەربگرێ بۆ بەدێهینانی سەربەخۆیی بە لەبەرچاوگرتنی واقیعی سیاسیی ئەمڕۆی هەرێم و وەك بناغەیەك بۆ دامەزراندنی قەوارەیەكی سەربەخۆ.
ئاشكرایە ئەو رەوشە نوێیە دەرەنجامی سیاسەتی حەكیمانە و بوێرانە و رۆڵی كاریگەری (سەرۆك مەسعوود بارزانی) و پارتیی دیموكراتی كوردستانە، كە بە وریاییەوە مامەڵە لەگەڵ پێشهات و رووداو و گۆڕانكارییەكان دەكەن، بەپێی سیاسەتێكی دووربینانە و لێهاتووانەی (سەرۆك مەسعوود بارزانی) سەرۆكی هەرێمی كوردستان و هەروەها سەرۆكی حكوومەتی هەرێمی كوردستان و بە پشتیوانی و هاوكاریی لایەنە سیاسییەكان و تەواوی رێكخراوەكانی كۆمەڵگای نەتەوەیی هاتووەتە كایەوە كاتێك پشتیوانی و پاڵپشتیی وڵاتانی جیهان بۆ كۆمەكیكردنی هێزی پێشمەرگە و ئاوارە و لێقەوماوان دابین كرا، بۆیە پێویستە سوپاسی حكوومەت و گەلی ئەمەریكا و نەتەوە یەكگرتووەكان و حكوومەت و گەلانی ئەورووپا بكەین، هەروەها سوپاسی گەل و كۆماری ئیسلامیی ئێران و وڵاتانی دراوسێ و هەموو ئەو وڵاتانەی دیكە، كە لە رووی سەربازی یا مرۆیییەوە هاوكاریی كوردستانیان كردووە.
بەرقەراربوونی ئاساییشی سیاسی لە عێراق هۆكارە بۆ رێگرتن لە بڵاوبوونەوەی تیرۆر لە جیهاندا، بۆیە پێویستە وڵاتانی بڕیاربەدەستی جیهان و هاوپەیمانانیان و ئەنجوومەنی ئاساییشی نێودەوڵەتی، چارەسەرێكی گونجاو و بەپەلە بۆ ئەو كێشەیە بدۆزنەوە و بە كۆدەنگیی جیهانی بڕیار بدەن بۆ رووبەڕووبوونەوەی تیرۆر و رێگرتن لە تەشەنەكردنی و بنبڕكردنی، هەروەها وڵاتانی بێلایەنیش لەمەودوا دەستەوەسان نەبن و هەڵوێستی خۆیان دیاری بكەن لە بەگژداچوونەوەی مەترسیی تیرۆر و ئیرهاب.
جەماوەری دڵسۆزی كوردستان...
سەبارەت بە بارودۆخی عێراق گومانی تێدا نییە، كە هۆكاری ئەو شەڕوشۆڕ و كوشتار و قەیرانە خوێناوییەی ئەو دواییە بۆ سیاسەتە چەوت و ناڕاستەكانی دەسەڵاتدار و كاربەدەستانی بەغدا دەگەڕێتەوە، هەروەها پاشەكشەی پرۆسەی سیاسی و بەتاڵكردنەوەی لەناوەڕۆكی دیموكراسی و نیشتیمانییەكەی لەو ماوەی رابرد رۆڵی نەرێنی هەبووە لە داخوران و هەڵوەشانەوەی هاوپەیمانیی هێزە پەیوەندیدارەكان و دامەزرێنەرانی پرۆسەی سیاسی و پەیڕەوكردنی نەهجێكی سیاسی دژ بەدەستوور و تەوافوق و بنەماكانی دەستپێكی پرۆسەی سیاسی، بۆیە هیوادارین دەرس و پەند لەو رابردووە تاڵە وەربگیرێت و دەسەڵاتدارانی داهاتووی بەغدا راستەڕێی دیموكراسی بگرنە بەر، هەروەها پێویستە سەرلەنوێ متمانە لە نێوان هێزە عێراقییەكان و پێكهاتە نیشتیمانییەكان بنیات بنرێتەوە دوور لە تاكڕەوێتی و وەلانان و پەراوێزخستن، هەروەها گێڕانەوی عێراق بۆ سەر راستەڕێی خۆی و بونیاتنانی دەوڵەتی دامەزراوەیی.
لە دوای پێكهێنانی حكوومەتی نوێی عێراقی فیدڕاڵ، پێویستە ئەو دەرفەتەی لە بەردەستدایە سوودی لێ وەربگیرێت و هەموو لایەنە كوردستانییەكان ئەوە بخەنە روو كە ئێمە چەندین بژاردەمان لە بەردەستدایە و هەركاتێك مافەكانمان پێشێل بكرێن كاریان لەسەر دەكەین، هەروەها بە یەكدەنگ و بە هەڵوێستێكی بەهێزەوە سوور بن لەسەر بەدەستهاتنی ماف و ئیستیحقاقە دەستوورییەكانمان و ژینگەیەكی نوێی ئەوتۆی سیاسی دروست ببێ بە ئەقڵییەت و بڕوابوون بە دیموكراسییەت و تەوافوق و دەستاودەستكردنی دەسەڵات و پاراستنی بەهاكانی ئازادی و مافەكانی مرۆڤ و پێكەوەژیانی ئارەزوومەندانە، هەروەها هەوڵدان بۆ بونیاتنانی شەراكەتێكی راستەقینە و كردەنی لە عێراقێكی نوێدا و چارەكردنی بەپەلەی كێشە و قەیرانەكانی ئەو ناوچانەی شەڕ و ماڵوێرانی لێ كەوتووەتەوە.
هەڤاڵان و جەماوەری تێكۆشەری كوردستان...
ئێمە لە كاتێكدا یادی (53)ـیەمین ساڵەی هەڵگیرسانی شۆڕشی مەزنی ئەیلوول دەكەینەوە، ئاماژە دەدەین بەوەی نیشتیمانەكەمان بە درێژایی سنووری هەرێمەكەی كەوتە بەر پەلامار و هێرشی ناڕەوای دەوڵەتی خەلافەتی بەناو ئیسلامی (داعش) و بە سەدان هەزار كەس لە ناوچە كوردستانییەكانی دەرەوەی ئیدارەی هەرێمی كوردستان ئاوارەی هەرێم بوون وەكو سەدان هەزار كەسی دیكەی برایانی كریستیان و عەرەبی پارێزگاكانی مووسڵ و تكریت و ئەنبار و دیالە و شار و شارۆچكەكانی دیكەی عێراق، ئەمە جگە لە هاونیشتیمانیانی رۆژئاوای كوردستان، بەڵام خاكی كوردستان وەك هەمیشە پەناگەیەكی ئارام و ئاسوودەیی بووە بۆ هەر هاووڵاتییەكی دەرەوەی هەرێم و تەواوی كوردستانیان لە بەهاناوەچوون و هاریكاریكردنی ئاوارەكان و پەنابەران و هاوكاریكردینیان، درێخیتان نەكردووە، سەربەرزین بە مەردایەتی و مرۆڤدۆستیتان، بە حەواندنەوە و هاریكاریكردنیان، كە ژمارەیان دەگاتە دوو ملیۆن كەس.
ئێمە كاتێك زۆر بە توندی ئەو تاوانە دەستەجەمعی و نامرۆییانەی بەو دواییەی تیرۆریستان ئیدانە و مەحكوم دەكەین و بە جینۆسایدی لە قەڵەم دەدەین، بە تایبەتی كۆمەڵكوژیی كوردانی ئێزدی لە شنگال كە كارەساتێكی گەورەی مرۆیی كەموێنەیە و پێویست دەكات وڵاتە بڕیاربەدەستەكانی جیهان و نەتەوە یەكگرتووەكان و ئەنجوومەنی ئاساییش و رێكخراوەكانی مافی مرۆڤ، پەلەی لێ بكەن بۆ رێگرتن لە بەردەوامیی ئەنجامدانی ئەو تاوانكاریانە و بە كۆدەنگییەوە میكانیزمی بەپەلە رێك بخەن بۆ بەهاناهاتنی دانیشتووانی ئەو ناوچانە و ناوچەكانی دیكە و فریاكەوتنی دیل و بێسەروشوێنكراوان، هەروەها جێی خۆیەتی لێرەوە رۆڵی قارەمانانەی هێزەكانی پێشمەرگەی كوردستان بەو ئیمكانیاتە دیاریكراوەی بەردەستیان بەرز بنرخێنین لە رووبەڕووبوونەوەی تیرۆریستان و دوژمنان و نەیاران و داكۆكیكردنیان لە هاووڵاتیان و ناوچەكانیان و پاراستنی سنوور و خاكی كوردستان، بۆیە بە شایەدیی دۆست و دوژمنان تەنیا هێزێكی رێكخراو و بەتوانا لە سەرتانسەری عێراق هێزی پێشمەرگەی كوردستانە بە هاریكاریی ئەم دواییەی هەندێ هێز و فڕۆكەوانی وڵاتە یەكگرتووەكان، توانیویەتی بە قوربانیدان و لەخۆبووردوانە بەشێكی زۆر لە ناوچە كوردستانییەكانی دەرەوەی ئیدارەی هەرێم كۆنترۆڵ بكاتەوە و ئازاد بكات، بەمەیش هاووڵاتیان دڵنیا دەكەینەوە، كە بە هەموو هێز و توانایاكمانەوە وەك چۆن هەوڵمان داوە زیاتر كار دەكەین چ لەسەر ئاستی ناوخۆ یا دەرەكییەوە بۆ زیاتر بەهاناهاتنی هاووڵاتی و هاونیشتیمانیانمان و پاڵپشتیكردنیان و رزگاركردنی شار و دێهاتەكانیان و گەڕانەوەیان بۆ زێدی رەسەنی خۆیان.
لەو بۆنەیەدا جارێكی دیكە جەخت دەكەینەوە سەر هاوپەیمانەتی و دۆستایەتی و گیانی بەرپرسیارەتی و گوتاری هاوبەش و هەماهەنگی و هاوكاری لەگەڵ هێز و لایەنە سیاسییەكانی دیكەی كوردستان بۆ پتەوكردنی یەكڕیزی و پتر رێكخستنی نێوماڵی كوردستان و وەلانانی كێشە و گیروگرفتە لابەلاكان بۆ رووبەڕووبوونەوە و چارەكردنی كێشە هەنووكەیییەكان و شەڕی داسەپاوی تیرۆریستان.
ئێمە كاتێك یادی ئەو بۆنە پیرۆزە دەكەینەوە، هەمدیسان بەڵێن بە خوێن و رۆحی پاكی شەهیدان و گەلەكەمان دەدەین و جەخت دەكەینەوە لەسەر بەردەوامبوون لەسەر هەمان رێبازی كوردایەتی و نیشتیمانیمان بۆ پاراستنی ئەو ئەزموون و دەسكەوتانەی، كە بەرهەمی خوێنی شەهیدان و قوربانییەكانمانن و برەودان بە پڕۆژەكانی بووژانەوە و بونیاتنان و ئاوەدانیی و دابینكردنی خۆشگوزەرانی و ئارامی و ئاسوودەیی بۆ تێكڕای هاووڵاتیان.
سڵاو لە گیانی پاكی سەرجەم شەهیدانی بزووتنەوەی رزگاریخوازیی كورد.. ئەوانەی بە خوێنی خۆیان سەر تاشەبەردی چیاكانیان بە دەیان داستان و سەروەری نەخشاند...
نەمری و سەروەری بۆ رۆحی پاكی (بارزانیی نەمر) و (كاكە ئیدریس)ـی هەمیشە زیندوو...
سڵاو لە گیانی پاكی شەهیدانی بەرەكانی جەنگی دژەتیرۆر و پاراستنی خاكی پیرۆزی كوردستان...
سڵاو لە پێشمەرگە نەبەردەكانی بەرەكانی جەنگی دژ بە تیرۆریستان...
سڵاو لە جەماوەری خۆڕاگر و پشتیوانی پێشمەرگەی كوردستان...
سڵاو لە خۆڕاگریی خانەوادە ئاوارەكانی ناوخۆ و دەرەوە...
سڵاو لە تەواوی ئەو گەل و وڵاتانەی هاریكار و هاوخەمی دۆزە رەواكەمانن..
هەر بەرز و شەكاوە بێت ئاڵای كورد و كوردستان... دواجار سەركەوتن هەر بۆ ئیرادەی گەلەكەمانە...
مەكتەبی سیاسیی پارتیی دیموكراتی كوردستان
11-ی ئەیلوولی 2014
