ئەمڕۆ پێشمەرگە ژمارەیەک گوندی دەڤەری مەخمووری کۆنتڕۆڵ کرد
"کرێکار شاکر" بەرپرسی لیژنەی ناوچەی دێبەگەی پارتی دیموکراتی کوردستان بە پەیامنێری رایگەیاند: ئەمڕۆ بەیانی پێشمەرگە هێرشی کردە سەر ناوچەکانی دەوروبەری مەخموور و توانیان گوندەکانی کوشاف و تەلخێمێ گەورە و بچووک و کلکەی میزانی و ساقیە و بناری قەرەچۆغ رزگار بکەن و هێزی پێشمەرگە توانی تیرۆرستانی داعش راو بنێت و چەکدارانی داعش دوای هێرشی پێشمەرگە لە ماوەیەکی کەمدا ناوچەکەیان چۆل کرد.
کرێکار شاکر گوتی: لە هێرشی ئەمڕۆی هێزەکانی پێشمەرگەدا، داعش زیانی زۆری بەرکەوتووە و ئەوەی بینراوە سێ تەرمیان بەجێ هێشتووە و دوو ئۆتۆمبێڵی هەمەر کەوتوونەتە دەست پێشمەرگە و لە گوندی زمارە تیرۆرستان دو بۆمبیان نابۆوە، بەڵام پێش ئەوەی بتەقێنەوە لەلایەن هێزی پێشمەرگەوە پووچەڵ کرانەوە.
