پۆلیسی نەهێشتنی تاوانی هەولێر دوو تۆمەتباریان لە بەردەم فامیلی مۆڵ دستگیر کرد کە خەریکی دزینی دوو ماتۆڕ سکیل بوون.



دوای ئاگاداركردنەوەی پۆلیسی نەهێشتنی تاوانی هەولێر لە سەرهەڵدانی دیاردەی دزینی ماتۆڕسكیل لە شاری هەولێر و دەوروبەری، پۆلیس چاودێری و بەدواداچوونی بۆ ئەم دیاردەیە چڕ كردەوە و تواندرا تۆمەتباران دەستگیر بكرێن.



عەقیدی مافپەروەر (محەمەد حەمەدەمین) ئەفسەری نووسینگەی رۆژهەڵات بۆ نەهێشتنی تاوان، رایگەیاند: "دوای تۆماركردنی چەندین سكاڵا سەبارەت بە دیاردەی دزینی ماتۆڕسكیل لە چەند شوێنێكی شاری هەولێر و دەوروبەری، دۆسیەی لێكۆڵینەوەمان كردەوە، كارمەندانی نەهێشتنی تاوانیش دوای چاودێرییەكی ورد، لە چەند شەوی رابردوو و لەو كاتەی كە دوو تۆمەتبار سەرقاڵی دزینی دوو ماتۆڕسكیل بوون لە بەردەم فامیلی مۆڵ، دەستگیریان كردن".



ناوبراو گووتی: "تۆمەتباران بە ناوەكانی (ا.ع.ا) لەدایكبووی (١٩٩٧)، (ع.ە.ا)، لەدایكبووی (١٩٩٨) كە هەرزەكارن، پاش دەستگیركردنیان دانیان بە تاوانەكەیاندا نا و گوتیان كە لە ماوەی رابردوو دا (٩) ماتۆڕسكیلیان لە شاری هەولێر و دەوروبەری دزیوە".



عەقید (محەمەد) ڕوونیشی كردەوە، "دادوەری لێكۆڵینەوە بریاری دا بە بەندكردنی تۆمەتباران بە پێی مادەی (٤٤٦) لە یاسای سزادانی عێراقی و گواستنەوەی پەڕاوەكە بۆ بنكەی پۆلیسی نەوجەوانان بەپێی تایبەتمەندی".

داواشی لەو هاووڵاتیانە كرد كە دزیی هاوشێوەیان لێ كراوە، سەردانی نووسینگەی رۆژهەڵات بۆ نەهێشتنی تاوان بكەن.

ڕاگەیاندنی پۆلیس

hewlerpolice@gmail.com