پەرلەمانتارێکی لیستی هاوپەیمانی کوردستانی وێرای ئەوەی داوا لەحکومەتی عێراق دەکات هاوکاری ئەو کوردانە بکات کەوا لە رۆژئاواوە هاتوونەتە هەرێمی کوردستان، هاوکات داواش لە کۆمەڵگەی نێودەوڵەتی دەکات کوردەکانی سوریا بپارێزێت و کۆمەکى مرۆڤانەشیان بۆ ته‌رخان بكات تا لەناو وڵاتى خۆیان بمێنن.

ئەندامی ئەنجومەنی نوێنەرانی عێراق سه‌ر به‌هاوپەیمانی کوردستانی مەحمود عوسمان، رایگەیاند:\"رۆژانە بەهەزاران کوردى رۆژئاوا دەربازى هەرێم دەبن و ترسی تیرۆر و شەڕ و برسێتى رادەکەن، پێویستیان بەهەموو جۆرە کۆمەکێک هەیە، لەکاتێکدا کە داوا لە حکومەت و هاولاتیانى هەرێم و حکومەتى بەغدا دەکەین، بەهەموو شێوەیەک هاوکاریان بکەن، پێویستە حزبەکانى رۆژئاوا یەکگرتوو بن و هه‌ست به‌ بەلێپرسراوی بكه‌ن.\""

عوسمان داوای لە کۆمەڵگەی نێودەوڵەتی کرد، کورد لە سوریا بپارێزێت و کۆمەکى مرۆڤانەشیان بۆ ته‌رخان بكات تا لەناو وڵاتى خۆیان بمێنن و ناچارى چۆڵکردنى و دەربەدەربوون نەبن، هەموو ئه‌و وڵاتانه‌ی گرنگی به‌ رەوشى سوریاوە ده‌ده‌ن، پێش هەموویان ئەمریکا و روسیا، کار بۆ کۆتاییهێنان بەشەر و شۆر لەو وڵاتە بکەن، هه‌وڵی هێنانەدى رژێمێکى دیموکراتى و دادپەروەری و نیشتمانى بده‌ن کە گەلى کوردیش لەچوارچێوەیه‌دا بەمافەکانى خۆى شادبێت."