14ی‌ ئاب/ ئۆگۆست (گوڵان میدیا)- ئەگەرچی لەبودجەی ساڵی ٢٠١٣ بڕیار درابوو 3 سەنتەری ئۆتیزم لە شارەکانی هەولێر و سلێمانی و دهۆک دروست بکرێت، بەڵام دوای تێپەڕ بوونی 8 مانگ تاکو ئێستا بەردی بناغەی هیچ یەکێک لە سەنتەرەکان دانەنراوە. ئەمەش لەکاتێکدایە ڕەوشی منداڵانی ئۆتیزم ڕۆژ لەدوای ڕۆژ لە خراپ بوونە و ڕێژەکەشی لە زیادبووندایە.

فەرەیدون بێوار، بەرپرسی پێشووی کۆمەڵەی ئۆتیزمی کوردستان، بە پەیامنێری ڕاگەیاند \"ئەگەر ئێستاش دەست بە دروست کردنی ئەو سەنتەرانە بکرێت ئەوا نزیکەی چوار ساڵی دیکەی دەوێت تاکو سەرجەم کارەکانی بەکۆتا دێت\"".
گوتیشی پێویستە کۆمەڵه‌ی ئۆتیزمی کوردستان فشارەکانی خۆی بۆ سەر حکومەت چڕ بکاتەوە تاکو هەرچی زووتر دەست بکرێت بەدانانی بەردی بناغەی ئەو سەنتەرانە.
هه‌روه‌ها داوای لەوەزارەتی کاروباری کۆمەڵایەتی کرد لە ئێستاوە کارمەند ڕەوانەی دەرەوەی وڵات بکات تاکو بە باشی ڕاهێنانیان پێ بکرێت و دواتر لەو سەنتەرانەی دروست دەکرێت کار بکەن.
بەپێی ئامارێک لە هەرێمی کوردستان زیاتر لە 700 منداڵی تووشبوو بە نەخۆشیی ئۆتیزم هەیە و له‌ جیهاندا له‌ هه‌ر 88 منداڵ، یه‌کێک تووشی ئۆتیزم ده‌بێت."