28ی‌ ته‌مموز/ یۆلیۆ (گوڵان میدیا)- دوای ھەوڵ و کۆششی زۆر بۆ ھاوردنی جووتێک حاجی لەقلەق بۆ سەر ھێلانەکەی مزگەوتی خانەقای ھەولێر کە لەو کاتەی لەلایەن کەسێکی چەکدارەوە لەرۆژگاری نەگریسی شەری ناوخۆ لەسالی 1996 تیرۆرکرابوو ، بەم ھۆیەشەوە ھێلانەکەی بەبێنازی مابووەوە ، ئەمرۆ لە دیدارێکی تایبەت لە دیوانی پارێزگا ھەریەک لە ھوشیار نوری لەک لە سەنتەری رۆشنبیری و کلتووری بەھرەو مام زیاد شێروانی و دەشتی مەلا سمایل باغەمرەیی شارەزا لە بواری پەروەردەکردن و راھێنانی بالندە و بەتایبەتیش حاجی لەقلەق ، لەگەل بەرێوەبەری راگەیاندن و پەیوەندییەکانی پارێزگای ھەولێر کۆبوونەوە .

لە دیدارەکەدا سەرکەوتنی ھەولەکان راگەیاندرا کە جووتێک حاجی لەقلەق وەکو بەرنامەی یەکەم کە تەمەنیان کەمتر لەسالێکە ئامادەن بۆ دانانەوەیان لە سەر ھێلانەکەو راھێنانیان لەگەڵ ژینگەی دەورووبەرەکەو دابین کردنی پێداویستی بژێوی و خۆراک بۆیان و ، تەرخان کردنی کەسانێک بۆ چاودێری و سەرپەرشتیکردنیان و بەر لە جەژنی رەمەزانی پیرۆزیش جووتە حاجی لەقلەقەکە دادەنرێن و نیشتەجێ دەکرێن .

بەرێوەبەری راگەیاندنی پارێزگا رایگەیاند کە پارێزگاری ھەولێر زۆر پەرۆشی ئەم بەرنامەیە بووەو ھەموو پشتەوانییەکی لەم کارە کردووە ، کە سالانێکە خەلکی ھەولێر پەرۆشی ئەوە بوونە دووبارە حاجی لەقلەق بگەرێتەوە سەر ئەو منارەیەو تێکەل بەژیانی خەلکی ھەولێر ببێتەوە ، راشیگەیاند کە ژمارەیەکی زۆرتر لە حاجی لەقلەق بۆ ئەم دەورووبەرەی مزگەوتەکەو پارکی شار و ئەو پارکانەی تری شاری ھەولێر دەھێنرێن و رادەھێنرێن بۆ مانەوەیان بەشێوەی ھەمیشەیی وەکو کلتوورێکی رەسەنی شاری ھەولێر .