٧ی‌ ته‌مموز/ یۆلیۆ (گوڵان میدیا)- بەشی لێکۆڵینەوە لە تاوانەکانی کوشتن کە سەر بە پۆلیسی نەھێشتنی تاوانی ھەولێرە، دوای چاودێری و بەدواداچوونێکی ورد، کەسێکیان بە ناوی (ھـ.ع.ح) دەستگیر کرد کە تۆمەتبار بوو بە کوشتنی (٢) دوو کەس و (٦٠٠) حاڵەتی دزیکردن.

وتەبێژی پۆلیسی پارێزگای ھەولێر ڕائید کاروان عەبدولکەریم، ڕایگەیاند کە دوای ئەوەی لە رۆژی ٢٨/٤/٢٠١٣ حاڵەتێکی کوشتن لە پیشەسازیی باشوور لە ھەولێر تۆمار کرا، ھێزەکانی پۆلیسی نەھێشتنی تاوان پاش لێکۆڵینەوەی ورد لە حاڵەتەکە، توانییان کەسێک دەستگیر بکەن کە دانی بە ئەنجامدانی ئەو تاوانە و حاڵەتێکی دیکەی کوشتندا ناوە.

ڕائید کاروان عەبدولکەریم ھەروەھا ئاماژەی دا کە جگە لەو تاوانانەش، تاوانباری ناوبراو ئەوەشی درکاندووە کە پتر لە ٦٠٠ دزیی لە ھەولێر و دەوروبەریدا ئەنجام داوە، بۆیە پەڕاوی لێکۆڵینەوە خراوەتە بەردەم دادوەر و بڕیار دراوە بە بەندکردنی تاوانبار بەپێی ماددە (٤٠٦) لە یاسای سزادان.

گوتیشی: وێڕای ئەوەی زۆربەی کەلوپەلەکان لەلایەن پۆلیسەوە دەستیان بەسەردا گیراوە و بۆ خاوەنەکانیان دەگەڕێندرێنەوە، تا ئێستاش لێکۆڵینەوە لەگەڵ ئەو تاوانبارەدا بەردەوامە و دۆسیەی تایبەتی بۆ کراوەتەوە.