بەناوی خوای گەورەو میهرەبان

برایانی خۆشەویست

زۆر خۆشحاڵم ئەم دەرفەتەم بۆ رەخسا بەخزمەتی ئێوە بگەم و زۆر سوپاستان دەكەم بۆ ئەو پێشوازییە گەرمە، ئەم ناوچەیە تایبەتمەندیی خۆی هەیە، ئەم ناوچەیە زۆری پێشكەش بەكوردستان كردووە، من خۆم 10 ساڵ لەم دەڤەرەدا پێشمەرگە بووم كە مەڵبەندی سەركردایەتیی شۆڕشی ئەیلوول بوو تاوای لێهاتبوو ناوی گەڵاڵە ئەوكاتە لە بەغدا بەناوبانگتر بوو، چونكە بارەگای شۆڕش و سەركردایەتیی لێبوو، بۆیە ئێمە پێمان خۆشە هەموو شتێك بۆ خزمەتی ئەو ناوچەیەو هەموو ناوچەكانی كوردستان بكرێ، ئەمڕۆ كە هاتووم بۆ ئێرە بۆ ئەوەی پێتان ڕابگەیەنم ئەم ناوچەیە دەبێ بەئیدارەیەكی سەربەخۆ واتا بۆ ڕاگەیاندنی بەئیدارەبوونی ناوچەكە هاتووم بۆ ئەوەی باشتر خزمەتی ئەم ناوچەیە بكرێت، هەرچەندە ئەوەی من دەیبینم قەزای سۆران یەكێكە لەو شارانەی لەكوردستان زۆر بەخێرایی گەورەبووە و بوو بەشارێكی گەورە، منیش لەیادمە كاتی خۆی ئەم دەشتە یەك خانوویشی لێ نەبوو، هەر تەنها دیانە بوو بازگەو كۆنتڕۆڵی حكوومەتی عێراقیش لەدووڕیانی ڕەواندز بوو تەواو ئیتر بەڵام سوپاس بۆ خودا ئێستا فراوانترەو پەنا بەخوا هەمیشە هەروا ئاوەدان دەبێت و هەموو شوێنەكانی كوردستان ئاوەدانیی زیاتر دەبێت، ئیتر ئومێدەوارم دوای ئەوەی ئەم بڕیارە جێبەجێ دەكرێت و حكوومەت كاری لەسەر دەكات بۆ و ئامادەكاریی پێویستی بۆ بكات و ئیتر ئەوە پێویست نەبێت ئێوە ئەم جۆرە داواكارییانە پێشكەش بكەن و هەر خۆتان جێبەجێی بكەن، بەڵام ئەم داواكارییانە بەگرنگیی وەردەگرین و لەگەڵ حكوومەتی هەرێمی كوردستان باسیان دەكەین و ئەوەی مومكین بێت پەنا بەخوا دەیكەین و بێگومان دەبێ بەجیددی لەسەر ئەو گرفتانە بوەستین و هەوڵی چارەسەركردنیان بدەین.

من ئومێدەوارم مەسەلەی بۆمببارانی ئەم سنوورەی ناوچەكەتان كۆتایی هاتبێت، چونكە لەوە دەچێت ئەو ئەركەی لەگەڵ جەنابی مام جەلال سەرفمان كرد تاحەددێك ئەنجامی بوو و ئومێدەوارم بەردەوام بێت و ئەو تۆپباران و بۆمبارانەش بوەستێ، هەرچەندە هێشتا لایەكی زۆری ماوە، بەڵام لەلایەكی دیكەوە گەیشتۆتە ئەنجام كە بوەستێ.

ئێستاش بۆ ئێمە وەكو خەڵكی كوردستان یەكهەڵوێستی گرنگترین شتە بۆ ئێمە، هێشتا تەحەددای زۆرمان لەپێشە و پێویستە ئێمە یەكهەڵوێستیی خۆمان بپارێزین و خۆشبەختانە لەوەدەچێت هەر كاتێك پێویست بەیەكهەڵوێستی هەبێت هەموو لایەنەكان گرنگیی ئەو یەكهەڵوێستییە دەزانن و بەكردەوەش دەیسەلمێنن و حەزدەكەم ئێوەش دڵنیابن پەنا بەخوا كێشەی ئێمە كێشەی كوردستان بەرەو پاش ناڕوات و پێویستە بەرەوپێشەوە بچێت، ئێمە خوێنێكی زۆرو قوربانییەكی یەكجار زۆرماندا، ئەوەی كە بەدەستهاتووە زۆر كەمترە لەو قوربانییانەی كە داومانە، بەڵام ئێستا ئەمە مومكینە، ئێمە دەبێ ئەوەی بەدەستهاتووە بیپارێزین و كاربۆ ئەوە بكەین فراوانترو باشتری بكەین، شت بە عاتیفە نابێ بەڵكو پێویستە بەدیراسەت بێت و جیاوازییەكی زۆریش لەنێوان ئەوەی كە مافی خۆتەو ئەوەی دەسەڵاتی خۆتە كە چەند دەتوانی لەو مافە بەدەستبهێنیت هەیە. ئەوەی كە بەدەستهاتووە نابێ بەهیچ شێوەیەك كەمبكرێتەوە هەرچەندە بەداخەوە ئێستا هەندێ هەوڵی واهەیە پاشەكشە لەدەستوور لەفیدراڵی لەزۆرشتی دیكە بكرێت، بەڵام ئەمە مەحاڵە، نە گەلی عێراق بەمە ڕازی دەبێ و نە ئێمە وەكو خەڵكی كوردستان بەوە ڕازی دەبین و ئێستاش ئێمە چاوەڕوانی ئەوەی هەڵوێستی بەغدا چۆن دەبێت بۆ ئەوەی ئایا شاندی ئێمە بچێت یان نا، بەڵام زیاتر ئەگەری ئەوە هەیە شاندی ئێمە بچێت بۆ ئەوەی چارەسەری ئەو گرفتانە بكەن كە هەن.

بۆ ئێمە زۆر گرنگە كە ئەوانەی ئەمڕۆ هاوبەشی ئێمەن لەحوكم گوێمان لێبگرن، چونكە ئەم حكوومەتە زۆریی لەسەر شانی خەڵكی كوردستانەوە دروستبووە و كەس مننەت لەسەر ئێمە ناكات و بڵێ ئەمە مافی ئێوەیە پێتانی دەدەین لەكاتی داڕشتنی دەستووریش زۆر بەڕوونی باسی ئەو مەسەلانە كراون، هێزو یەكپارچەیی عێراق خۆی لەپابەندبوون بەم دەستوورە دەبینێتەوە، ئەم دەستوورە وایكردووە هەموومان بەیەكەوە لەچوارچێوەی عێراق كۆببینەوەو ئەمڕۆ بەهیچ شێوەیەك بۆ هیچ لایەنێك دەكرێ نەپێشی دەكرێت و نەمومكینیشە بەتەنیا و بەكەیفی خۆی تەفسیری دەستوور بكات وەك چۆن خۆی دەیەوێ، ئێمە هاوبەشین و پێویستە هاوبەشیی ڕاستەقینە لەعێراق پیادە بكرێت ئەمە مەرجی سەرەكییە بۆ ئەوەی عێراق سەقامگیر بێت.

هەندێك كەس قسەی زۆر زل دەكەن، بەڵام بابپرسن: چەند كاتژمێر كارەبا لە بەغدا هەیە؟ مەسەلەكە هەر ئەوە نییە ئێمە تەنها لەمافی گەلی كورد بكەین، چونكە مافێكی ئاسایی ئێمەیەو ئەركی ئێمەیە بەرگری لەگەلی كورد بكەین، بەڵام لەڕاستیدا ئێمە بەرگری لەخەڵكی عێراق دەكەین، ئێمە بەرگری لەدیموكراسی دەكەین، بەرگری لەهاوبەشیی ڕاستەقینەو دەستوورو فیدراڵی دەكەین، ئەمە هەموو تەنها بەكوردستانەوە پەیوەست نییە بەڵكو بەهەموو گەلی عێراقەوە پەیوەستە، فەرموو ئێمە تواناكانمان لەگەڵ ئەوەی لە بەغدا لەبەردەستی حكوومەتی مەرگەزی یاخود حكوومەتی فیدراڵی هەبوو هەژمار ناكرێت، فەرموو چییان بۆ خەڵكی عێراق لەبواری خزمەتگوزارییەوە پێشكەشی خەڵكی عێراق كردووە هەر لەبەسڕاوە بگرە تاوەكو دەگەیتە كەركووك؟ هەندێ شوێن لەكۆی 24 كاتژمێردا 2 كاتژمێر كارەبایان هەیە و لەهەندێ شوێنی دیكەش 4 كاتژمێر، خۆ ئەوان دەبێ وەڵامی خەڵكی عێراق بدەنەوە، قەیناكا مەسەلەی كوردستان و ئەو مشتوومڕەی كە لەگەڵ هەرێمی كوردستان هەیە دەیخەینە لایەك، بەڵام وەڵامی ئەوان چییە بۆ ئەم مەسەلەیە؟ بۆ تاوەكو ئێستا هیچ خزمەتگوزارییەكتان پێشكەش بەگەلی عێراق نەكردووە؟ بۆ خەڵكی عێراق لەو مەینەتییەدا دەژی؟ كاتێك باسی ئەو پرسانە دەكرێت ئەوان بەرەو لایەكی دیكەی دەبەن، مەحاڵە ئێمە بهێڵین بیكەنە ناكۆكیی كوردو عەرەب ئەمە مەحاڵە ئەنفال و كیمیاباران نەیتوانی ئێمە بۆ ئەم هەڵوێستە ڕابكێشێت، یاخود كەسێك بتوانێ كەلێنێك لەهاوپەیمانیی كورد وشیعە دروستبكات، بەڵام ئەوەی كاربەدەستەو حكوومەت بەڕێوەدەبات دەبێ پابەندی دەستوور بێت، هیچ كەسێك ئەمڕۆ لەعێراق حاكمی موتڵەق نییە، دەستوورێك هەیە پەیوەندیی بەهەموو بوارەكانی ئەم وڵاتەوە هەیە، پابەندبوون بەم دەستوورە مەرجە بۆ ئەوەی بارودۆخی عێراق سەقامگیر بێت، بۆئەوەی لەهەموو ئەو گرفتانەی لەپێشماندا هەن ڕزگارمان ببێت، ئێمە ئەوە دەڵێین و ئەگەر خەڵكێك پێی ناخۆش بێت، ئێمە باسی تاكڕەوی دەكەین دەڵێین بەڵی تاكڕەوی هەیە بۆیە باسی دەكەین، بەڵام چارەسەریشی هەیە، چارەسەریی چییە؟ گەڕانەوەیە بۆ دەستوور و ئەو ڕێككەوتنانەی كردوومانە. فەرموون دەتوانین زۆر بەدۆستانەو بەڕاشكاوییەوە باسی هەموو شتێك بكەین چەندی هەرێم تیایدا كەمتەرخەمە؟ ئێمە ئەوكات ئەگەر وابێت و كەمتەرخەمی و كەمووكوڕیمان هەبێت لەشوێنێك ئێمە ئامادەین بڵێین بەڵی وایە و چاكی دەكەینەوە، بەڵام باوەڕبكەن یەك هەنگاویشمان نەهاوێشتووە لەدژی دەستوور و هەرچی كردوومانە بەپێی دەستوور بووە.

پرسی نەوت و غاز، ئێستا یەكێكە لەگرفتەكان وانییە بڵێین تەنها گرفت بێت، كاتی خۆی كە دەستووری عێراق دانرا تیایدا هات: نەوتی عێراق موڵكی هەموو عێراقە و واریداتی بۆ هەموو خەڵكی عێراقەو ئێمەش لەسەر ئەوە هیچ گرفتێكمان نییە و دەڵێی ئەو كێڵگانەی لەمەولا دەردەهێنرێن هەرێمی كوردستان بەهاوبەشی لەگەڵ حكوومەتی عێراق ئیدارەی دەكات، كاتی خۆیشی ئێمە لەسەر ئەوە ڕێككەوتین ئەگەر ئەم یاسایە بچێتە پەرلەمان چ هەرێم و چ حكوومەتی فیدراڵ دەتوانێ گرێبەستی نەوت ئیمزا بكات،ئ ەم شتە ڕێككەوتنی لەسەركراوە نەك بگوترێ ئێمە شتێكمان لەدژی دەستوور كردبێت خۆ ئێستا هەندێ كەس پەیدابوونە بەكەیفی خۆیان دەڵێن كورد لەدژی دەستوور دەجوڵێتەوە و وا دەكات وادەكات، ئەم قسانەش لەڕاستیدا هیچ بنەمایەكی نییەو ئێمە لەدەستوورمان لانەداوە، بەڵام یەك زەرەش ڕازی نابین كەس بەكەیفی خۆی و میزاجی خۆی تەفسیری دەستوور بكات.

هەروەكو گوتم ئێمە پێمان خۆشە هەموو گرفتەكان بەدیاڵۆگ چارەسەرببن، هەرێمی هاوبەشی حوكمە لە بەغدا، زۆرجاری وا هەیە هەندێ كەس دەڵێن كورد دەیەوەی ئەوەی خۆی بۆ خۆی بێت و ئەوەی بەغداش هەر بۆ ئەوان، نەخێر ئەمە وانییە.

كاتێك دەوڵەتی عێراق دروست بوو لەدوو نەتەوەی سەرەكی پێكهات، نەتەوەی عەرەب و نەتەوەی كورد، ئەمە نییە بگوترێ پەرلەمانتاری ئێمە لە بەغدا 3 كەسن یان 40 یان 100 یان هەرچەند هەبن كوتلەیەكی حزبین یان سیاسی، ئەمانە نوێنەری نەتەوەن، نوێنەری نەتەوەی دووەمن لەعێراق، بۆیە ئەوەش بەڕوونی لەدەستووردا هاتووە بەدەر لەپرسە سیادییەكان هەر یاسایەك لەگەڵ یاسای هەرێم نەگونجا ئەوكات یاسای هەرێم دەخوات ئەگینا ئەگەر هەندێك بەتەمای ئەوەبن هەموو شتەكان ببەن بۆ پەرلەمان بێگومان كە بووە دەنگدان و بەو شێوەیە مامەڵە لەگەڵ هەرێمی كوردستان بكرێت ئێمە هیچ شتێك نابەینەوە، بەڵام ئێمە نەتەوەی دووەمین و عێراق بە یەكێتیی ئارەزوومەندانە دروستبوو، دەوڵەتێكی یەكێتیی ئارەزوومەندانەیە، ئێمە بەهەڵبژاردنی خۆمان بووینە بەشێك لەعێراق بەڵام بەمەرجێك عێراق خاوەنی ئەو دەستوورەبێت كە هەیە عێراقێكی فیدراڵ و دیموكراتی بێت.

لەبارەی داهاتەكانی نەوت، هەرچەندە غەدریشی تیادایە ئێمە لەگەڵ ئەوەین. تا ئەو كاتەی سەرژمێری دەكرێت و ئەوان لەسەرژمێری ڕادەكەن 17%ی داهاتی نەوتی عێراق بۆ هەرێمی كوردستان بێت، بەڵام بەشی كوردستان بەشێوەیەكی ڕاستەوخۆ بێتە هەرێم بەبێ ئەوەی وەزیرێك بتوانی بەكەیفی خۆی تەحەكومی تیادا بكات و بیەوێ وەكو كارتی فشار بەكاری بهێنێت لەدژی هەرێم، ئێمە ئەوە قبووڵ ناكەین.

من نامەوێ زۆر درێژە بەو مەسەلەیە بدەم، بەڵام ئێستا بەڵێ هەندێك گرفت هەن لەنێوان هەرێم و بەغدا، ئەو ڕۆژەش من لەگەڵ هەموو برادەرانی خۆمان ئەوانەی بەغدا چ ئەوانەی لەحكوومەتدان چ ئەوانەی لە پەرلەمان و بەدوورودرێژی باسی ئەو شتانە كراوەو هەواڵیشمان بۆ بەغدا ناردووە كە شاندی ئێمە دێ ئەگەر پابەندی بەدەستوور و بەو ڕێككەوتننانە بكرێ كە كراوە، ئەوكاتە ئێمە شاندی خۆمان دەنێرین، ئەگەر پابەندی ئەو دەستوورەو ئەو ڕێككەوتننانە نابن ئەوكات هاتنی شاندی ئێمە هیچ واتایەكی نابێت.

ئەو وەڵامانەش كە هاتوون دەڵێن نەخێر پابەندبوون بەدەستوورو بە ڕێككەوتننامەكان بەردەوام دەبێت و ئێمەش دیراسەتی دەكەین و تاوەكو ئێستاش بڕیاری كۆتاییمان نەداوە، بەڵام ئەگەر وابێت بەهەر حاڵیش دیالۆگ باشترەو ئەمجارە مەسەلەكە زۆر زۆر جیددییە، ئەم حكوومەتەی ئێستا لە بەغدایە لەسەر شانی كورد گەیشتە ئەم شوێنە و ئێستا ئینكاری ئەمە بكرێت شتێكی ناخۆشە، ئەگەر كورد نەبوایە ئەم حكوومەتە دروست نەدەبوو، ئێمە پێمان خۆشە چۆن كوردستان پێشبكەوێت ئەوەندەش ناوەراست و باشوور و ڕۆژهەڵات و ڕۆژئاوای عێراقیش پێشبكەوێت و حەزدەكەین لەم وڵاتەدا هاوبەش بین و پێكەوەبژین و یارمەتیی یەكتر بدەین و یەكتر ئیلغا نەكەین، بەڵام ئەگەر ئەم فەرهەنگە حاكم بێت یان هێشتا لەمێشكی هەندێ كەسدا مابێت، بەڕاستی زەمانی ئەوە نەماوە كەس كەس ئیلغا بكات و ئێمە هاوبەشین و ئێمە تابیعی كەس نین.

لەبارەی بارودۆخی هەرێمیش، سوپاس بۆ خوا ئێستا بارودۆخی هەرێم و پەیوەندیی نێوان حكوومەت و ئۆپۆزیسیۆن وحزبەكان بەرەو كەشوهەوایەكی باشتر دەڕوات و من هەندێ چاوپێكەوتنم دەستپێكردووە و بەردەوامیش دەبم، باوەڕ بكەن كە من سەرۆكایەتیی هەرێمی كوردستانم قبووڵ كرد بۆ ئەوە نەبوو بە من بڵێن سەرۆكی هەرێمی كوردستان، من زۆرجار گوتوومە و لەهەموو بۆنەیەكدا دووپاتیدەكەمەوە لای من پێشمەرگایەتیی لەهەموو شتێك گەورەترە، من مەبەستم لەوەدابوو مرۆڤ لەم پێگەیەوە دەتوانێ باشتر ئەو ئامانجانە بەجێ بگەیەنێ.

یەكەم: رێكخستنی ماڵی كورد و بۆ ئەوەی جارێكی دیكە خوێنی كورد بەدەستی كورد نەڕژێتەوە، ئەمە یەكێكە لە ئامانجە هەرە سەرەكییەكانی من بۆ ئەوەی ئەو بەرپرسیارێتییە وەربگرم و كاری بۆ بكەم و سەربەرزشم سوپاس بۆ خوا وابزانم هەنگاوی زۆر باشمان هاوێشتووە نەك هەر لەنێو هەرێمی كوردستان، بەڵكو لەناو بزووتنەوەی ڕزگاریخوازی گەلی كوردستان بەشێوەیەكی سەرتاسەری، ناكۆكی و بۆچوونی جیاواز دەبێت ئەمە هەمووی شتێكی زۆر ئاساییە، بەڵام كورد شەڕی كورد بكات یان كورد خوێنی كورد بڕێژێت نابێ ئەمە جارێكی دیكە دووبارە ببێتەوە.

دووەم: بۆ ئەوەی ئەم وڵاتە ببێ بە وڵاتێكی دامودەزگایی.

سێیەم: پێگەیەكی وا بۆ كوردستان دروست ببێت لەدەرەوە بەشێوەیەكی وابێت شایانی خەبات و قوربانیدانی بێت، ئەمڕۆش زیاتر لە 20 كونسوڵگەری و نوێنەرایەتیی حكوومەتەكانی جیهان لەكوردستاندا هەن كە 4 یان وڵاتی ئەندامی هەمیشەیی ئەنجوومەنی ئاسایشن، ئێستا لەهەولێر بارەگاو ئۆفیسیان هەیە، ئەمە بەخۆڕایی نەهاتووەو دەستكەوتی گەورەیە بۆ میللەتی كورد، جاران باوەڕبكەن ئێمە مەمنوون بووین بچینە دەرەوە سیناتۆرێك یان پەرلەمانتارو فەرمانبەرێكی پلە 4 و 5 و 6ی ئەم وڵاتە لەگەڵماندا تەنها دابنیشێت گوێمان لێبگرێت بۆ ئەوەی مەینەتییەكانی میللەتی خۆمانیان بۆ باس بكەین و وامان دەزانی دونیا هەموو هی ئێمەیە ئەگەر یەكێك دابنیشێ كاتژمێرێك یان نیو كاتژمێر گوێمان لێبگرێت و پێی بڵێین ئێمە ئەوەندە كەسەمان شەهیدبوون و ئەوەندە لادێی ئێمە وێرانكران و ئەوەندە كەسمان ئەنفالكران و ئەوەندە بۆمبە كیمیاوییە لەئێمە درا، ئەو تەنها بۆ ئەوەی گوێمان لێبگرێت كە ئەو شتانەی بۆ باس بكەین ئێمە پێمانوابوو ئەمە بۆ ئێمە دەستكەوتێكی گەورەیە، ئەمڕۆ لەو قۆناغەدا ئێمە گەیشتووینەتە كوێ؟ دەبێ سوپاسی خوای گەورە بكەین و سوپاسی دەست و بازووی پێشمەرگەو جەماوەری خەڵكی كوردستان بكەین.

چوارەم: لەبارەی ناوچە دابڕاوەكان كە ئەمەش مەسەلەیەكی زۆر گرنگەو ئەو مەسەلەیەش زەمەن چارەسەری ناكات، بەڵكو دەبێ بەپێی دەستوور چارەسەربكرێت ئەگینا ئەمە گرفتێكە دەبێ چارەسەر بكرێت و ئەوەی بەرژەوەندیی عێراقی بوێت دەبێ ئەو مەلەسەیە چارەسەربكات و ئەوەی نەشیەوێ عێراق جێگیر و سەقامگیر بێت و بەرەوپێشەوە بچێت با لەو مەسەلەیە ڕابكات، بەڵام ئەمە مەسەلەیەكی زۆر گرنگەو بەهیچ شێوەیەك سازشی لەسەر ناكرێ، زۆریش ڕوون و ئاشكرایە بڕیاری خەڵكی ئەو ناوچەیە قسەیەكی یەكلاكەرەوەیە نە ئێمە دەیدەین و نە حكوومەتی عێراق دەیدات و وەكو لەدەستووردا هاتووە دەبێ ئەمە جێبەجێ بكرێ.

پێنجەم: ئەمەش بۆ من مەسەلەیەكی زۆر زۆر گرنگە، دەبێ ئێمە كارێكی جیددی بكەین بۆ ئەوەی ببینە خاوەنی زمانی خوێندن و نووسین، هەموو میللەتێك زاراوەی جۆراوجۆری هەیەو ئێمەش وەكو هەر میللەتێكی دیكە، بەڵام خەڵكی دیكە و میللەتانی دیكە توانیویایە لەسەر زمانی خوێندن و نووسین ڕێكبكەون و زمانی خوێندن و نووسین دروست بكەن، ئێمەش پێویستیمان بەو زمانە هەیە، بۆیە ئەمە كارێكە مومكینە لە تەمەنی ئێمەمانان نەبێت، بەڵام پێویستە كاری بۆ بكەین بۆ ئەوەی نەوەكانی ئایندە كاتێك لە قوتابخانەكان قسە دەكەن یەك زمانی خوێندن و نووسینیان هەبێت، ئەوەی دیكە ئاساییە زاراوە هەبێت كە زۆرجاری وا هەیە ناوچە بۆ ناوچە گوند بۆ گوند زاراوەكانیان جیاوازن و كە خۆم زۆرجار قسەیان لەگەڵدا دەكەم دەزانم خەڵكی چ ناوچە و چ گوندێكن، كەواتە جیاوازی لەزاراوەكاندا هەیەو دەشمێنێتەوە، بەڵام زمانی خوێندن و نووسین كارێكی زۆر گرنگەو زۆریش پێویستە، بەڵام ئەمە كارێكی جیددی دەوێ وخەڵكێكی ئەكادیمی و شارەزاو پسپۆڕ ئامادەی بكەن و جارێكی دیكەش دەیڵێمەوە نەوەكانی داهاتوو دەتوانن بەری ئەمە بخۆن ور ِەنگە ئێمەمانان پێی ڕانەگەین.

بەهەرحاڵ من جارێكی دیكەش خۆشحاڵیی خۆم بەم چاوپێكەوتنە دەردەبڕم و هەمیشە كە دێمە ئەو ناوچەیە بەڕاستی بیری سەری زۆزك و هەندرێن و ئەو ڕۆژانە دەكەمەوەو دڵنیاش بن هەرچی لەتواناو دەسەڵاتی ئێمەدابێت بۆ بەختەەری ئێوەو پێشكەوتنی ناوچەكەتان دەیكەین و پەنا بەخوا هەر سەركەوتوو بەختەوەر دەبن.

زۆر سوپاس. زۆر مەمنوون