به‌ بۆنه‌ى یوبێلى زێرینى شۆرشى ئه‌یلول، فێستیڤالێك به‌ ئاماده‌بوونى به‌ڕێز مه‌سعوود بارزانی سه‌رۆكی كوردستان سازكرا و، تێیدا سەرۆك بارزانی وتارێكی پێشكەش كرد، ئەمەی خوارەوە دەقی وتارەكەیەتی:


ب ناڤێ خۆدایێ مه‌زن و دلۆڤان
خوشك و برایێن به‌ركه‌فتی، پێشمه‌رگه‌هێن قاره‌مانێن شوره‌شا ئیلۆنا مه‌زن، هه‌موو ئاماده‌بوویێن به‌رێز...
بۆ من شه‌ره‌فه‌كا مه‌زن بوو كو هوون ده‌عوه‌تا من بكه‌ن و ئه‌ز بهێم به‌شداریىَ ل گه‌ل هه‌وه‌ بكه‌م د رۆژه‌كا هوسا یا پیرۆز دا، ل جهه‌كىَ هووسا پیرۆز كو هێلینا شوره‌ش و به‌رخۆدانىَ یه‌، ئه‌و ژى ده‌ڤه‌را زاخۆیه‌، ئه‌ز سۆپاسیا هه‌وه‌ د كه‌م كو هه‌وه‌ ئه‌ف شه‌ره‌فه‌ دایه‌ من.
ئه‌ز ل ڤىَ ده‌رفه‌تىَ لڤێره‌ پیرۆزباهیه‌كا گه‌رم ل هه‌موو گه‌لىَ كوردستانىَ دكه‌م بۆ ڤىَ بیره‌وه‌ریا هوسا پیرۆز و ب راستى بۆ من ئه‌و پێشمه‌رگه‌هێن قه‌هره‌مان ئه‌ڤێن كو مایی د ژیانىَ دا یێن شورشا ئه‌یلولێ و من ب تڤه‌نگێن خۆ یێن برنۆڤه‌ من دیتین رۆحه‌كا دی دا مه‌، ئه‌م برینه‌ ڤه‌ بۆ وان رۆژێن سه‌ختێن خه‌بات و تێكوشانىَ كو ب وىَ لیلیا برنۆیىَ ب وىَ چه‌نكدىَ خۆ وان ئه‌ڤرۆ دروست كر، ئه‌وێن شه‌هید بووین خۆدىَ ب ره‌حمه‌تا خۆ لىَ بكه‌ت جهىَ وان بحه‌شته‌، ئه‌ڤێن ماین ژى جهىَ فه‌خر و شانازیىَ نه‌ بۆ مه‌، ئه‌و گه‌نجێن كو قه‌درىَ ڤانه‌ د زانن قه‌درىَ خۆ و قه‌درىَ ملله‌تىَ خۆ و قه‌درىَ مێژوویا خۆ و قه‌درىَ پاشه‌رۆژا خۆ ژى دىَ زانن، ئه‌وێن قه‌درىَ ڤان قه‌هره‌مانان نه‌زانن وه‌كى وىَ دارىَ نه‌ یا كو چ ره و ریشال نه‌بن و بایه‌كىَ سڤك ژی بهێت دىَ ئێخیت ئه‌و ژى دىَ د وه‌سا بن د ناڤ كوردستانىَ دا، چونكه‌ ئه‌گه‌ر مرۆڤى رێز و حورمه‌ت نه‌بیت بۆ مێژوویا خۆ و بۆ خه‌باتا خۆ و رۆلىَ قه‌هره‌مانێن ملله‌تىَ خۆ والله چ پاشه‌رۆژ ژى نابیت.
شورشا ئه‌یلولێ نه‌بتنىَ ل دژى دكتاتوریه‌تىَ بوو، شورشا ئه‌یلولێمێژوویه‌كا نوو دروستكر، راسته‌ شورشا ئه‌یلولێ ل دژى دكتاتوریه‌تىَ بوو، لىَ شوره‌شه‌كا كومه‌لایتى و كلتوورى و سیاسی بوو و شوره‌شه‌كا نه‌ته‌وه‌یی هه‌م ل خانه‌قینىَ هه‌تا زاخۆ پێكڤه‌ ملله‌تىَ كورد ب ئێك ده‌ست و ئێك پارچه‌ و د بن ئێك سه‌ركردایه‌تی دا چه‌ند جاران چووك ب رژێمێن به‌غدادا دانا بۆ هندىَ ئعترافێ ب مافێن ملله‌تىَ كورد بكه‌ن.
چه‌ندین كورِێن زاخۆ و دهۆكىَ و ئامێدیىَ و شێخان ل هه‌له‌بجه‌ و خانه‌قین و قه‌ره‌داخ شه‌هید بوون و چه‌ندین كورِێن خانه‌قینی و هه‌له‌بچه‌ و سلێمانى و كه‌ركوكى ژى ل ڤىَ ده‌ڤه‌رىَ یێن شه‌هید بووین، ئه‌ڤه‌ بۆ ئێكه‌م جار بوو د مێژوویا ملله‌تىَ كورد دا شوره‌شه‌كا هوسا یا نه‌ته‌وه‌یی ب ڤى ره‌نگى بیت، گه‌له‌ك جاران شوره‌ش د بوون سه‌رهه‌لدان د بوون، لىَ د ده‌ڤه‌رى بوون و نه‌ د بوونه‌ بزاڤێن نه‌ته‌وه‌یی د ناحیا مه‌یدانی ڤه‌، ژ به‌ر هندىَ ب راستى شورشا ئه‌یلولێمێژوویه‌كا نوو دروستكر و ل نك من ل هه‌موویىَ گرنگتر شورشا ئه‌یلولێباوه‌ری بۆ گه‌لىَ كوردستانىَ و بۆ هه‌ر تاكه‌كىَ كورد دروستكر كو باوه‌ری ب خۆ هه‌بیت، به‌لىَ ئه‌م ملله‌ته‌كین مه‌ مافىَ هه‌ى و ئه‌م د ئاماده‌ینه‌ بمرین د رێكا بده‌ستڤه‌ئینانا سه‌ركه‌فتنىَ و مافێن گه‌لىَ خۆ، به‌رى شورشا ئه‌یلولێئه‌و باوه‌ری ب خۆ نه‌بوو و ملله‌تىَ كورد زور خۆ ب غه‌ریب و بىَ كه‌س د زانى و خۆ ب كێم دزانى به‌رامبه‌ر خه‌لكىَ دی، لىَ شورشا ئه‌یلولێئه‌و دیوار شكاند، من نه‌ڤێت چو جاران ئه‌م تووشی غرورىَ ببین، لىَ من نه‌ڤیایه‌ چو جاران ئه‌ز كورده‌كىَ ببینم خۆ ل چ كه‌سه‌كى كێمتر بزانیت ل ڤىَ د دونیایىَ دا، ئه‌و مرۆڤن ئه‌م ژى مرۆڤین، وان مافىَ ژیانىَ یىَ هه‌ى و مه‌ ژى مافىَ ژیانىَ یىَ هه‌ى، شورشا ئه‌یلولێ دوپاتكر بۆ مه‌ كو هه‌كه‌ ملله‌ته‌ك ئاماده‌بیت بۆ قوربانیدانىَ دىَ به‌رهه‌م ژى هه‌بیت و ئه‌ڤرۆ به‌رهه‌مىَ وىَ خه‌باتىَ وىَ تێكوشانىَ یه‌ و یا ژ هه‌موویىَ ژى گرنكتر ژ بۆ مه‌ ئه‌ڤه‌یه‌ كو ئه‌م د سه‌ربلندین ب شوره‌شا ئیلۆنىَ، ژ به‌ر كو شوره‌شه‌كا پاك بوو، شوره‌شه‌كا ب ئه‌خلاق بوو و بۆ ئێكجار ژى كاره‌كىَ نه‌قانوونى نه‌هاته‌ كرن، كاره‌كى نه‌مرۆڤایه‌تى ل گه‌ل دوژمنێن مه‌ نه‌هاته‌ كرن، نه‌ مه‌عنا وىَ ئه‌و بوو مه‌ نه‌دشیا، مه‌ دشیا گه‌له‌ك تشتان بكه‌ین، لىَ شوره‌شه‌ك بوو راستا شوره‌شا ئه‌خلاقی بوو، پێشمه‌رگه‌هه‌كىَ ب ئه‌خلاق برایىَ وى ل ته‌نشتا وى شه‌هید د بوو، دا له‌شكه‌ر یان هه‌ر كه‌سه‌ك ئێخسیر بیت دا ئینیت نانى ده‌تىَ و خۆدان كه‌ت و ئینیت راده‌ست كه‌ت و رۆژه‌كىَ ژ رۆژان ئێخسیره‌ك نه‌هاته‌ كوشتن، ئه‌ڤ ئه‌خلاقىَ بلند جهىَ سه‌ربلندیىَ یه‌ و سه‌روه‌ریه‌كا گه‌له‌ك یا مه‌زن بوو ب راستى بۆ پارتی دیموكراتى كوردستان ب سه‌رۆكایه‌تیا بارزانی كو ئه‌ڤ میژوویه‌ دروستكر و هه‌ر تشته‌كىَ ژنوكه‌ پێڤه‌ بهێته‌ دروستكرن بناغىَ وىَ یىَ شورشا ئه‌یلولێیه‌ و ل سه‌ر وى بناغه‌ى دهێته‌ دروستكرن و من دڤێت لڤێره‌ ئه‌ز بۆ ڤان قه‌هره‌مانان و بۆ ڤى ملله‌تى دوپات بكه‌م ب ئانه‌هیا خۆدىَ هه‌تا دووماهیك نه‌فه‌س دىَ د به‌رده‌وام بین ل سه‌ر وان مه‌بادئ و قیه‌مان و ل سه‌ر رێكا وان و بۆ من ب خۆ وه‌كو كه‌س ب راستى تشتىَ كو ئه‌ز گه‌له‌ك شانازیىَ پىَ دكه‌م ئه‌ز ژى ئێك ژ وان پێشمه‌رگێن شورشا ئه‌یلولێبوویمه‌، مه‌زنترین شه‌ره‌فه‌ مه‌زنترین سه‌روه‌ریه‌ مه‌زنترین پۆسته‌ د دونیایىَ دا ب نیسبه‌تى من، پێدڤیه‌ ئه‌م به‌رده‌وام قیه‌م و روحا شورشا ئه‌یلولێ زیندی بهێلین ئه‌و ژى ب یادكرنا وىَ یه‌ و گه‌له‌ك جاران كومبوون و سمیناران بۆ گه‌نجێن مه‌ تێبگه‌هینن كو كه‌سىَ خێر ب مه‌ نه‌كریه‌ و ئه‌ڤ بارودوخه‌ یىَ ب خوینا هزاره‌ها شه‌هیدێن قه‌هره‌مانێن نموونه‌یه‌ك ل وىَ ئه‌ڤرۆ به‌رى بهێینه‌ ڤىَ هولىَ وێنێن وان ناڤێن وان ل هولا ته‌نشت ڤێره‌ هاتبوونه‌ هه‌لاویستن و ئه‌ڤه‌ نموونێن هزاره‌ها شه‌هیدێن دی نه‌ یێن كو هه‌ڤالێن وان برایێن وان گیانىَ خۆ كریه‌ قوربانى ژ بۆ هندىَ ئه‌ڤرۆ ل سایا سه‌رىَ وان و ڤان قه‌هره‌مانێن مایی ئه‌ڤه‌ بارودوخىَ مه‌ و ئه‌م یىَ ڤى نانی دخوین، لوتفا خۆدىَ یىَ، لىَ ده‌وله‌ت سه‌رىَ وان شه‌هیدا و ڤان قه‌رهه‌مانا شه‌هیدێن زیندی یێن كو مایی، هه‌كه‌ مرۆڤى د دونیایىَ دا وه‌فا نه‌بیت سیفه‌تىَ مرۆڤایه‌تیىَ ل سه‌ر نابیت، ئه‌وێن زه‌حمه‌ت دیتی و ماندیبوون دیتی و خه‌بات كری و گیانىَ خۆ كریه‌ قوربانی، چاوان دىَ هێنه‌ ژبیركرن هه‌ر چ نه‌بیت ب ئاخفتنه‌كا خۆش.
من دڤێت ئه‌ز ب ڤىَ هه‌لكه‌فتىَ بۆ هه‌وه‌یێن به‌رێز عه‌رز كه‌م كو مه‌ بریار یا دای و من كیتاب ژی بۆ سه‌رۆكاتیا جڤاتا وه‌زیران یا نڤیسی، رێزگرتن بۆ خه‌بات و تێكوشانا ڤىَ ده‌ڤه‌رىَ كو ببیته‌ ئیداره‌یه‌ك بۆ هندىَ دا باشتر خزمه‌تا ڤىَ ده‌ڤه‌رىَ بهێته‌ كرن و ب ئانه‌هیا خۆدىَ ل ڤان نێزیكان دىَ كه‌ڤیته‌ د وارىَ بجهئینانىَ دا و ئه‌ڤه‌ژى دیاریا مه‌یه‌ بۆ هه‌وه‌ د ڤىَ هه‌لكه‌فتا پیرۆز دا.
بابه‌ته‌كىَ دی من دڤێت ئه‌ز ئاماژىَ پىَ بده‌م كو ئه‌ڤ بارودوخىَ نه‌یىَ سروشتی یه‌ ل سه‌ر ڤان سنوران، سنورىَ هه‌رێمىَ ل گه‌ل توركیا و ل گه‌ل ئیرانىَ ژى. من دڤێت ئه‌ز گه‌له‌ك یىَ راستگۆ و سه‌ریح بم ل گه‌ل هه‌وه‌ و ل گه‌ل ملله‌تىَ كورد و ل گه‌ل هه‌موو ئالیه‌كى، ئه‌م گه‌له‌ك پىَ د نه‌خۆشین و ئه‌ڤ بارودوخه‌ مه‌ د ئێشینیت و هه‌تا نها پتر ژ 400 گۆندێن هه‌رێما كوردستانىَ نه‌هاتینه‌ ئاڤه‌دانكرن ل به‌ر ڤى بارودوخىَ نه‌یىَ سرۆشتى ب تایبه‌تى شریتا سنورى، ته‌قریبه‌ن هه‌ر ل زاخۆ هه‌تا دچیته‌ قه‌لادزىَ، مه‌ گه‌له‌ك بزاڤ یێن كرین و دىَ د به‌رده‌وام ژى بین راده‌یه‌ك بۆ ڤى بارودوخی بهێته‌ دانان، وه‌ختىَ كو مه‌ مفاتحا توركیا و ئیرانىَ كری كا بۆچی سنورێن مه‌ توپباران دكه‌ن ب ته‌یارا و تۆپا به‌رسڤا وان ئه‌وه‌ دبێژن مه‌ تشته‌ك ل گه‌ل هه‌رێمىَ نینه‌، هه‌رێم كه‌تواره‌كه‌ ده‌ستوورىَ عیراقىَ دانپێدان یا پێكرى و ئه‌ڤه‌ بارودوخه‌كىَ قانوونى یه‌ ب نسبه‌ت مه‌ ژ به‌ر هندىَ ئه‌م دىَ سه‌ره‌ده‌ریىَ گه‌ل كه‌ین، لىَ خه‌لكه‌كىَ هه‌ى د ناڤ ئاخا هه‌رێمىَ دا و ل سه‌ر سنورى دهێن خه‌لكىَ مه‌ له‌شكه‌ر و پاسدارێن مه‌ د كوژن و دهێنه‌ د ناڤ ئاخا هه‌رێمىَ دا، یان هوون هێزێن خۆ بۆ سنورى بینن مه‌ چ ئاریشه‌ نابن، یان ئه‌ڤ خه‌لكىَ ل سنورى باوه‌ریىَ بۆ چىَ كه‌ن ده‌ڤه‌رىَ به‌رده‌ن، یان كریارێن له‌شكه‌رى ل دژى مه‌ نه‌كه‌ن دیسا مه‌ چو ئاریشه‌ نینن، لىَ بهێن له‌شكه‌ر و پاسدار و خه‌لكىَ مه‌ ب كوژن و بهێنه‌ د ده‌ڤه‌رىَ دا ئه‌م نه‌چارین به‌ره‌ڤانیىَ ل خۆ بكه‌ین، ئه‌ڤ به‌هانه‌یه‌ یا د كه‌ڤیته‌ د ده‌ستێن وان دا، هه‌كه‌ ئه‌ڤ به‌هانه‌یه‌ نه‌بیت ئه‌و نه‌شێت هه‌رێما كوردستانىَ توپباران بكه‌ن و هه‌كه‌ كر ژى دىَ گه‌له‌ك گران ل سه‌ر وان راوه‌ستیت، مه‌ گه‌له‌ك بزاڤ یێن كرین ب خوشی و لێكگه‌هشتن و به‌رچاڤگرتن چ ل گه‌ل په‌كه‌كىَ و چ ل گه‌ل پژاكىَ ژى كو ئێدى بارودوخىَ هه‌رێمىَ به‌رچاڤ بگرن. ئه‌م یێن ل گه‌ل مافێن ملله‌تىَ كورد دا و نابیژێنى خه‌باتا خۆ نه‌كه‌ن، لىَ باوه‌ر بكه‌ن زه‌مانىَ شه‌رى نه‌مایه‌، ئانكو شه‌ركرن د ڤى بارودوخی دا زیانا وىَ پتره‌، ده‌مىَ ده‌رفه‌ت هه‌بیت تو ل ئه‌نقه‌ره‌ د ناڤ په‌رله‌مانىَ توركیا دا 30 یان40 یان 50 په‌رله‌مانتارێن ته‌ هه‌بن تو ل وێرىَ شه‌رىَ خۆ بكه‌ و سه‌د به‌رامبه‌ر دىَ ده‌ستكه‌فتان ب ده‌ستڤه‌ ئینی، دونیا هه‌موو دىَ ئاگه‌هدار بیت ژ بارودوخىَ ته‌، ره‌نگه‌ به‌رى 20 یان سیه چل سالان ئه‌م نه‌چار بووین وه‌كو بزاڤا رزگاریخۆازا كوردستانىَ ل هه‌ر پارچه‌یه‌كىَ تو شه‌رىَ خۆ بكه‌ى، ژ به‌ر كو شه‌رىَ مان و نه‌مانىَ بوو، شه‌رىَ پاراستنا پێناسه‌یا نه‌ته‌وه‌یی بوو، مه‌ ئه‌و قوناغ ده‌ربازكر، ئه‌ڤرۆ ل هه‌ولێرىَ پتر ژ 20 كونسولگه‌رى و نڤیسینگه‌هێن فه‌رمى یێن ده‌وله‌تان یێن هه‌ین، نێزیكی چوار ده‌وله‌تێن ئه‌ندام د جڤاتا ئێمناهیىَ دا یێن هه‌ین كونسلگه‌ریێن وان یىَ ل وێرىَ، سه‌ره‌ده‌ری ل گه‌ل هه‌رێما كوردستانىَ وه‌كو سه‌ره‌ده‌ریه‌كا فه‌رمی یا دهێته‌ كرن، ئه‌ڤه‌ ده‌ستكه‌فته‌ بۆ هه‌موو ملله‌تىَ كورد بۆ هه‌ر كورده‌كىَ د ناڤ هه‌رێما كوردستانىَ دا د ناڤ كوردستانا باشوور دا یان هه‌ر پارچه‌یه‌كا دی، كاره‌كىَ بكه‌ى بۆ تێكدانا ڤى بارودوخی مه‌زنترین تێكدانه‌ به‌رامبه‌ر نه‌ته‌وا كورد د كه‌ت.
وه‌ختىَ من سه‌رۆكاتیا هه‌رێمىَ قه‌بوول كرى من هنده‌ك ئارمانجێن خۆ هه‌بوون، من بۆ هندىَ نه‌بوویه‌ بێژنه‌ من سه‌رۆكىَ هه‌رێمىَ ده‌مىَ من گۆتیه‌ هه‌وه‌ ئه‌ز پێشمه‌رگىَ شورشا ئه‌یلولێو گولانىَ مه‌ ل نك من مه‌زنترین پۆسته‌ و مه‌زنترین شه‌ره‌فه‌، من دڤیا ئه‌ز مالا ورد رێك بێخم و جاره‌كا دی خوینا كوردان ب ده‌ستىَ كوردان نه‌هێته‌ رێتن، من دڤیا ڤى وه‌لاتى بكه‌مه‌ وه‌لاته‌كىَ موئه‌سساتى، پێگه‌هه‌كىَ وه‌سا بۆ ڤى ملله‌تى دروست بكه‌ین ل ده‌رڤه‌ ژ روویىَ دبلوماسى ڤه‌ كو ژ هه‌ژى خه‌بات و قوربانیدانا ڤى ملله‌تی بیت و خۆ ئاماده‌ بكه‌ین بۆ پاشه‌رۆژىَ، ژ به‌ر كو دونیا یا د گۆهرینىَ دا، ب راستى هه‌ر تشته‌كىَ ببیت ره‌نگه‌ ئه‌م دىَ په‌نایىَ بۆ به‌ین بۆ هندىَ ڤى بارودوخی چاره‌ بكه‌ین، لىَ شه‌رىَ كورد و كورد نابیت دروست بیته‌ڤه‌، نه‌لڤێره‌ و نه‌ل چ جهان و نه‌ ل گه‌ل چ هێزێن كوردستانى، ئاموژگاریا من ئه‌وه‌ بۆ هه‌موو ئالیه‌كى ب شه‌ر ئاریشه‌ چاره‌سه‌ر نابن ئیلا پێدڤیه‌ ب ئاشتی و لێكتێگه‌هشتن بیت، هه‌كه‌ رێكا ئاشتیىَ هاته‌ هه‌لبژارتن ئه‌م یىَ د خزمه‌تا هه‌موو ئالیه‌كى دا و هه‌ر چ یا مه‌ بده‌ست بهێت دىَ كه‌ین، هه‌كه‌ هه‌لبژارتن هه‌لبژارتنا شه‌ری بیت، ئه‌ڤه‌ نوكه‌ ئه‌ز دوپات دكه‌م، ئه‌نجام نابیت خوینه‌كا زێده‌تر دىَ هێته‌ رێتن و گه‌له‌ك حه‌یفه‌ ژى چو خوینا كورده‌كىَ یان توركه‌كى، چ فارسه‌كىَ چ عه‌ره‌به‌كىَ و یا هه‌ر مرۆڤه‌كىَ بهێته‌ رێتن بێی ئه‌گه‌ر جهىَ داخه‌كا مه‌زنه‌ ب راستى، ژ به‌ر كو ماله‌ك خێزانه‌ك دىَ داخدار بیت، ناحیا مرۆڤایه‌تى ئه‌ڤه‌ تشته‌كىَ گه‌له‌ك یىَ نه‌خۆشه‌ و ئه‌نجام ژى نابیت، ژ به‌ر هندىَ ده‌مىَ كو پێدڤی نه‌بیت تو شه‌رى بكه‌ى و تو شه‌رى بكه‌ى تو یىَ بارودوخىَ خۆ تێك د ده‌ى و تویىَ دۆزا خۆ تێك د ده‌ى. نه‌ ب تۆپ و فرۆكان ئه‌ڤ كێشه‌ ب دووماهیك دهێت نه‌ ب كوشتنا چه‌ند له‌شكه‌ره‌ك و چه‌ند پاسداره‌كان ئه‌ڤ ئاریشه‌ ب دوماهیك دهێت ئه‌ڤه‌ ئیلا پێدڤیه‌ ب ئاشتى و لێكتێگه‌هشتن بیت، هه‌كه‌ ب ئاشتی بیت وه‌كو من گۆتى ئه‌م یىَ د خزمه‌تا هه‌موو ئالیه‌كى دا و هه‌كه‌ د رژد ژى بن ل سه‌ر شه‌رى ب راستى هه‌ر چو مه‌ بده‌ست بهێت دىَ كه‌ین ژ بۆ هندىَ كو ئه‌ڤ شه‌ره‌ ل هه‌رێما كوردستانىَ دوور بكه‌ڤیت و ژڤىَ زێده‌تر مه‌ پىَ چىَ نابیت ئه‌م بكه‌ین و جاره‌كا دی ژى ئاموژگاریا من ئه‌وه‌ هه‌موو ئالی به‌ر ب ئاشتیىَ بچن و خیارا ئاشتى و لێكتێگه‌هشتنىَ ب هه‌لبژێرن نه‌ك خیارا شه‌رى.
ئه‌ڤه‌ بابه‌ته‌ك بوو من دڤیا بۆ هه‌وه‌ ئاماژىَ پىَ بده‌م، ژ به‌ر كو ب راستى بۆ من یىَ گرنگه‌ و ئه‌ز دزانم بۆ هه‌وه‌ هه‌موویان ژى یىَ گرنگه‌ و ئه‌ڤه‌یه‌ سیاسه‌تا مه‌ و ئه‌ڤه‌یه‌ برِیارا مه‌.
یا دی ئه‌ز حه‌ز دكه‌م هوون د پشت راست بن دۆزا كوردى ل وىَ چو ده‌رىَ كو به‌ر ب پاش بهێت، مه‌سه‌لا مه‌ دىَ به‌ر ب پێش چیت و به‌ر ب پاش ناهێته‌ ڤه‌ و هه‌موو پێنگاڤێن خۆ ژى ئه‌م دىَ ب دیراسه‌ت هاڤێژین و ئه‌لحه‌مدوللا ئه‌ڤرۆ ئه‌و مه‌وقعىَ بۆ كوردستانىَ دروست بووى، ل دونیایىَ گه‌له‌ك خه‌لكه‌ك حه‌سیدیىَ ب مه‌ د به‌ت.
ئومێده‌وارین كو به‌رنامىَ من دانایی بۆ چاكسازیىَ د هه‌رێمىَ دا، ب نسبه‌ت من گه‌له‌ك مه‌سه‌له‌كا گرنگه‌ و ئه‌ز یىَ رژدم ل سه‌ر و بۆ هه‌وه‌ دوپات دكه‌م ئه‌ز دىَ ل سه‌ر چم و بابه‌تىَ چاكسازیىَ دشیاندا نینه‌ ده‌ستا ژىَ به‌ر ده‌م هه‌تا د گه‌همه‌ هه‌موو راستیان و هه‌تا هه‌موو پێرابوونێن پێدڤی ژى بهێنه‌ كرن.
ل دووماهیىَ ئه‌ز چ ئاخفتنێن دی نابینم كو پێدڤی بن ب بێژم ئیلا ئه‌و نه‌بیت كو بێژمه‌ هه‌وه‌ هه‌موو ملله‌تىَ كورد یىَ عه‌زیزه‌ ل ده‌ڤ من، هه‌موو خیشك و برایێن منن، به‌س هوون خه‌لكىَ ڤىَ ده‌ڤه‌را زاخۆ ب راستى هوون روحا منن.