سوپای عێراق رێگای دەرچوون لە شارۆچکەی حەویجە لە پارێزگای کەرکووک بۆ هاووڵاتییان دیاری دەکات.

بەپێی هەواڵی میدیا عێراقییەکان، هێزی ئاسمانیی ئەو وڵاتە هەزاران نووسراوی بەسەر شارۆچکەی حەویجەدا باراندووە و تێیدا داوا لە هاووڵاتییان دەکات خۆیان لە بنکە و بارەگاکانی رێکخراوی تیرۆریستی داعش بە دوور بگرن.

لە نووسراوەکاندا، سوپای عێراق داواش لە چەکدارانی داعش دەکات چەکەکانیان دابنێن و خۆیان رادەستی هێزە عێراقییەکان بکەن.

سوپای عێراق ئامۆژگاریی خەڵکی حەویجە دەکات، کە لەکاتی ئۆپەراسیۆنی رزگارکردنەوەی شارۆچکەکە، رێگاکانی دەرچوونیان پێ دەڵێن، کە بڕیاری لەسەر دراوە و تەنیا بەهۆی پلانی ئۆپەراسیۆنەکە، جارێ ئاشکرا ناکرێن.

رۆژی پێنجشەممە 31/8/2017، حەیدەر عەبادی، سەرۆک وەزیرانی عێراق رایگەیاند، کە پارێزگای نەینەوا بە تەواویی رزگار کرایەوە و بە چەکدارانی داعشیشی گوت، ”دوو رێگای دەرچوونتان لەبەردەمە، یان کوژران یازن خۆڕادەستکردن“.

لە مانگی حوزەیرانی 2014 و لە سەردەمی سەرۆک وەزیرانیی نوری مالیکی، دوای هەرەس هێنان و شکستی سوپای عێراق، شارۆچکەی حەویجە لە پارێزگای کەرکووک و شاری شنگال و زۆربەی ناوچەکانی پارێزگاکانی نەینەوا، سەڵاحەدین، دیالە و ئەنبار لەلایەن چەکدارانی رێکخراوی توندڕەوی داعش داگیر کران.











باسنيوز