گوتەبێی میلیشیاکانی حەشدی شەعبی رایدەگەیەنێت، کە راوێژکاری سەربازیی سوپای ئێران و میلیشیای حزبوڵڵای لوبنانی بەشداریی ئۆپەراسیۆنی رزگارکردنەوەی شارۆچکەی تەلەعفەر لە پارێزگای نەینەوا، دەکەن.

ئەحمەد ئەسەدی، گوتەبێژی میلیشیاکانی حەشدی شەعبی لە گرتەیەکی ڤیدیۆییدا، کە لە پەیجی تایبەتیی خۆی لە تۆڕی کۆمەڵایەتیی (فەیسبووک) بڵاوی کردووەتەوە، رایگەیاندووە، راوێژکارە سەربازییەکانی ئێران و حزبوڵلا ”پاڵپشتیی“ هێزە عێراقییەکان دەکەن لە ئۆپەراسیۆنەکەدا.

ئەحمەد ئەسەدی هەروەها رایگەیاندووە، کە ئەو راوێژکارانەی ئێران و حزبوڵلا ”وەک ئۆپەراسیۆنەکانی دیکە“ هاوکاریی هێزە عێراقییەکان دەکەن بۆ پێشکەشکردنی راوێژی سەربازیی بە هێزەکانی عێراق.

گوتەبێژی میلیشیاکانی حەشدی شەعبی جەختی لەوە کردووەتەوە، کە بوونی راوێژکارەکانی ئێران و حزبوڵڵا لە ئۆپەراسیۆنی رزگارکردنەوەی تەلەعفەر ”بە ئاگاداری و رەزامەندیی حکوومەتی عێراقییە“.

سەرلەبەیانیی رۆژی یەکشەممە 20/8/2017، حەیدەر عەبادی، سەرۆک وەزیران و فەرماندەی گشتیی هێزە چەکدارەکانی عێراق دەستپێکردنی ئۆپەراسیۆنی رزگارکردنەوەی تەلەعفەری راگەیاند.

ئۆپەراسیۆنی رزگارکردنەوەی مووسڵ لە 17.10.2016 دەستی پێ کرد و دوای نۆ مانگ، تەنیا ناوەندی شاری مووسڵ رزگار کراوەتەوە و شارۆچکەی تەلەعفەر و چەند ناوچەیەکی دیکەی سنوورەکە هێشتا لەژێر دەسەڵاتی رێکخراوی تیرۆریستی داعشدا ماونەتەوە.

لە مانگی حوزەیرانی 2014 و لە سەردەمی سەرۆک وەزیرانیی نوری مالیکی، دوای هەرەس هێنان و شکستی سوپای عێراق، شارۆچکەی حەویجە لە پارێزگای کەرکووک و شاری شنگال و زۆربەی ناوچەکانی پارێزگاکانی نەینەوا، سەڵاحەدین، دیالە و ئەنبار لەلایەن چەکدارانی رێکخراوی توندڕەوی داعش داگیر کران.










باسنيوز