رێکخراوی تیرۆریستی داعش بازاڕی فرۆشتنی کچە رفێندراوەکان بۆ شارۆچکەی حەویجە لە باشووری رۆژئاوای کەرکووک دەگوازێتەوە.



بەپێی هەواڵی میدیا عێراقییەکان، داعش ئەو کچ ژنانەی لە گوندێکی باشووری شاری مووسڵ رفاندووە و لە یەکێک لە بارەگاکانی لە حەویجە، ”بە نرخی جیاجیا“ دەیانفرۆشێتەوە.



پێشتر داعش لە شاری مووسڵ ژن و کچە رفێندراوەکانی بە چەکدارەکانی دەفرۆشتەوە، بەڵام دوای رزگارکردنەوەی شاری مووسڵ لە سەرەتای مانگی 7ـی 2017، داعش بازاڕەکەی گواستووەتەوە حەویجە.



دوای داگیرکاریی داعش لە عێراق، چەکدارانی ئەو رێکخراوە سەدان کچ و ژنیان بە تۆمەتی ”کافربوون“ دەستبەسەر کرد و لە نێوان خۆیاندا مامەڵەیان پێوە کردوون، کە رێکخراوەکە بە ”سەبایا“ ناساندوونی.



لە مانگی حوزەیرانی 2014 و لە سەردەمی سەرۆک وەزیرانیی نوری مالیکی، دوای هەرەس هێنان و شکستی سوپای عێراق، شارۆچکەی حەویجە لە پارێزگای کەرکووک و زۆربەی ناوچەکانی پارێزگاکانی نەینەوا، سەڵاحەدین، دیالە و ئەنبار لەلایەن چەکدارانی رێکخراوی توندڕەوی داعش داگیر کران.
BAS NEWS-