رێکخراوی مافی مرۆڤی نێودەوڵەتی رایگەیاند، رۆژانە بەڵگەیان بەدەست دەگات کە هێزە ئەمنییەکانی عێراق و گرووپە میلیشیاکان، خەڵک بە گومانی داعشبوون، دەکوژن.

سارا ویتسن، بەڕێوەبەری بەشی رۆژهەڵاتی نێوەڕاست و باکووری ئەفریقا لەبارەی بارودۆخی عێراق دوای شەڕی داعش و کۆنترۆڵکردنەوەی موسڵ هۆشداری دەدات و دەڵێت "هەستی تۆڵەکردنەوە لەنێوان پێکهاتەکان شۆڕبووەتەوە بۆ نێو سەرباز و هێزە ئەمنییەکان".

سارا ویتسن دەڵێت "گەیشتووینەتە قۆناخیک کە هەموو رۆژێک بەڵگەنامە و دیمەنی ڤیدیۆیی و وینەمان بەدەست دەگات کە هێزەکانی سەر بە حکومەتی عێراق و گرووپە میلیشیاکان، خەڵک بەتۆمەتی داعشبوون، دەکوژن".

ئەو بەرپرسەی رێکخراوی هیومان رایتس وۆچ راشیگەیاندووە "بارودۆخی نێو زیندانەکان زۆر خراپە و رەچاوی مافەکانی مرۆڤ ناکرێت. هەروەها ئازاری گیراوان دەدرێت و ژمارەیەکی زۆری دەستگیرکراو دەخرێنە نێو ژووری بچووکەوە".




رووداو