شازادەی جێنشینی سعودیە پیرۆزبایی رزگارکردنەوەی شاری مووسڵ لە وەزیری دەرەوەی ئەمریکا دەکات.



رۆژی یەکشەممە 16.7.2017، محەمەد بن سەلمان، شازادەی جێنشینی سعودیە بە تەلەفۆن پەیوەندیی بە جێیمس ماتیس، وەزیری دەرەوەی ئەمریکا کردووە و باسی بەردەوامبوونی شەڕی دژی تیرۆریان کردووە.



هەروەها رۆژنامەی (ریاز)ی سعودی بڵاوی کردووەتەوە، محەمەد بن سەلمان بەبێ ئاماژەکردن بە حکوومەت و هێزە عێراقییەکان، پیرۆزبایی رزگارکردنەوەی شاری مووسڵی لە جێیمس ماتی کردووە و رایگەیاندووە، ”پێویستە“ شەڕی دژی تیرۆر لە دژی هەموو ئەوانەی پاڵپشتیی ماددی و مەعنەوی تیرۆری جیهانی دەکەن، بەردەوام بێت.



هەفتەی رابردوو دوای نۆ مانگ، حەیدەر عەبادی، سەرۆک وەزیران و فەرماندەی گشتیی هێزە چەکدارەکانی عێراق رزگارکردنەوەی شاری مووسڵی راگەیاند.



ئۆپەراسیۆنی رزگارکردنەوەی مووسڵ لە 17.10.2016 دەستی پێ کرد و دوای نۆ مانگ، تەنیا ناوەندی شاری مووسڵ رزگار کراوەتەوە و شارۆچکەی تەلەعفەر و چەند ناوچەیەکی دیکەی سنوورەکە هێشتا لەژێر دەسەڵاتی رێکخراوی تیرۆریستی داعشدا ماونەتەوە.



لە مانگی حوزەیرانی 2014 و لە سەردەمی سەرۆک وەزیرانیی نوری مالیکی، دوای هەرەس هێنان و شکستی سوپای عێراق، شارۆچکەی حەویجە لە پارێزگای کەرکووک و زۆربەی ناوچەکانی پارێزگاکانی نەینەوا، سەڵاحەدین، دیالە و ئەنبار لەلایەن چەکدارانی رێکخراوی توندڕەوی داعش داگیر کران.



باسنيوز